هاد الجهة ناشطة وهاد الجهة ناعسة.... 5 ديال الجهات كتاخد كثر من 72% من مجموع الساكنة لي محركة فالمغرب .

مصدر الصورة

كود -الرباط //

كتبيّن معطيات جديدة للمندوبية السامية للتخطيط بلي 5 ديال الجهات فالمملكة كتاخد 72,3% من مجموع السكان الناشطين اللي عندهم 15 سنة ولفوق، ف 2025، الشي اللي كيعكس تفاوت فالتوزيع الجغرافي ديال سوق الشغل.

وحسب المذكرة الإخبارية على وضعية التشغيل، كتاخد جهة الدار البيضاء–سطات أعلى ترتيب بنسبة 22,6% من مجموع السكان النشيطين، باعتبارها القطب الاقتصادي اللول فالبلاد، وكتجي من بعدها جهة الرباط–سلا–القنيطرة بـ13,4%، عاد مراكش–آسفي بـ12,9%، وفاس–مكناس بـ11,9%، وأخيراً طنجة–تطوان–الحسيمة بنسبة 11,6%.

وسجلات ربعات جهات معدلات نشاط فاتت المعدل الوطني اللي مستقر فـ43,5%، وكيتعلق الأمر بجهات طنجة–تطوان–الحسيمة بنسبة 47,3%، والجنوب بـ46,8% والدار البيضاء–سطات بـ46,2%، ومراكش–آسفي بـ43,6%. فالمقابل، بقات نسب النشاط ضعيفة نسبياً فجهات بني ملال–خنيفرة، والشرق، ودرعة–تافيلالت، وسوس–ماسة.

وبخصوص الشوماج، كتجمع خمسات جهات 71,8% من مجموع العاطلين وطنياً، جات جهة الدار البيضاء–سطات المرتبة الأولى بنسبة 25,5%، متبوعة بجهة فاس–مكناس (13,8%)، والرباط–سلا–القنيطرة (13,1%)، ثم الشرق (11%)، وطنجة ـ تطوان ـ الحسيمة (8,3%).

وتسجلات أعلى معدلات البطالة فجهات الجنوب والشرق، بنسبة فاتت 22%، أما فجهات مراكش ـ آسفي، ودرعة–تافيلالت، وطنجة ـ تطوان ـ الحسيمة، اللي ما وصلاتش حتى لـ10%.

وكتأكد هاد الأرقام بلي إشكالية الخدمة فالمغرب ما زالت مرتبطة بالتفاوتات المجالية، وكتطرح من جديد سؤال العدالة الترابية وضرورة خلق فرص الشغل فالمناطق اللي كتعرف هشاشة اقتصادية وبطالة طالعة.