تفعيل قرار جديد بمرسى كازا: فتح الباب 4 بالليل حتى 7 صباح لتسهيل حركة الرموكات وتنظيم شحن السلعة بعدما احتجو مهنييو القطاع .

مصدر الصورة

أميمة عطية – كود كازا ///

دخل القرار ديال فتح الباب رقم 4 بالليل حيز التنفيذ ابتداءً من فاتح يونيو الجاري، في مرسى الداربيضاء ، بعد سنين من المطالب ديال مهنيي النقل والخدمات اللوجستيكية باش توسع أوقات العمل فلميناء.

و حسب قرار العاملي ولي توصلات “كود” بنسخة منو ، هاد الخطوة جات باش تخفف من حدة الزحام وتحسن انسيابية حركة ديال رموكات والبضائع فلمرسى، اللي كيبقى أكبر ميناء تجاري فالمملكة.

هاد القرار العاملي رقم 15/2026 الصادر عن عامل عمالة مقاطعات الدار البيضاء-أنفا، وكيقضي بفتح الباب رقم 4 مؤقتاً يومياً من منتصف الليل حتى الساعة 7 صباحاً، مع استمرار العمل عبر الباب رقم 6، بهدف تخفيف الضغط على مستوى لمرسى وتحسين ظروف الدخول والخروج بالنسبة للمهنيين.

وحسب نفس لمعطيات لمتوفر فهاد لقرار خرج بعد سلسلة اجتماعات تنسيقية بين السلطات المحلية، الوكالة الوطنية للموانئ، والمتدخلين الأمنيين والتقنيين، اللي خصصوها لدراسة المشاكل المرتبطة بحركة النقل والبضائع داخل الميناء ومحيطه، والبحث على حلول عملية لتحسين مردودية هاد المنشأة الاستراتيجية.

وفنفس السياق، كان سبق وعبرات النقابة الوطنية لقطاع النقل الطرقي والبضائع، لي منضوية تحت لواء الاتحاد الوطني للشغل بالمغرب، على لقلق ديالها من الظروف المهنية وسط المرسى فكازا .

كيف ما و ضحات النقابة، فبلاغ من قبل ولكتوفر“گود” على نسخة منو أنها كتابع الإكراهات اليومية لي كيعانيو منها شوافريا فلمرسى ، و لي كتأثر على ظروف الخدمة والصحة وسلامة ديالهم.

ودعات النقابة باش تاخد إجراءات باش ينقص الزحام فلمرسى، وتسرع عمليات لي كيدوزو من سكانير ،وحتى تحقاق الوزن ديال سلعة لي كتشارجا فرموكات من السفن ديريكت فلميناء، كيف ما شددو على أن هادشي كيشكل خطر عليهم .

وكانت طالبت نقابة، فبلاغ ديالها بتحسين ظروف لخدمة فلمرسى وبتوفير مرافق صحية وسط الپور، وقاعات ديال الصلا، وحتا بلايص فين شوافريا اشربو لما، باعتباره هادشي مرافق وشروط أساسية لاستمرارية هاد النشاط .