الوكيل العام ففاس حرّك المياه اللي كانت الراكدة.. ضواصة النوطير لحمامصي تحت المجهر ومصدر لـ"كود": عشرات الملفات عندو فالقضاء .

مصدر الصورة

أحمد الطيب – كود////

شجاعة الوكيل للملك لدى محكمة الاستئناف بفاس ذ. عبد الرحيم زيدي خلاّت عدد من المشتبه فيهم يعيشو على أعصابهم. كاين فيهم اللي سحاب ليه مكاينش الحساب وباللي بغا يديرو يديرو. ولي بغا يدي للناس ديالها ساهلة.

هشام لحمامصي أحد الموثوقين اللي الاسم ديالو رجع بارز وغادي يطول شويا معانا بسبب حجم القضايا لي عندو فالقضاء. “كود” نبشات فهاد الملفات الثقيلة اللي هادي سنوات وهي فالقضاء. عدد منها تحكم والآخر مزال وكاين ضواصة أخرى مزال فالتحقيق وكاين اللي معروض على محكمة النقض.

عدد من ضحايا هاد النوطير الشهير هضرات معاهم “كود” وحكاو المعاناة لي دوز عليهم، والتمس من الرئيس المنتدب للمجلس الأعلى للسلطة القضائية ورئيس النيابة العامة باش يشوفو قضايا هاد الموثق، وعلاش بعض الملفات ديالو مزال معطلة، خاصة وحد الضوصي اللي هرضات عليه “كود” البارح ومعروض دبا على محكمة النقض ومطلوق بسببه فحالة سراح بكفالة فاتت 70 مليون سنتيم.

الوكيل العام ففاس زيدي كان وقف بيديه على تفكيك إحدى أكبر الشبكات الإجرامية التي تتعاطى التزوير في محررات رسمية واستعمالها واصطناع تضمينات وتغيير الحقيقة في أوراق ومحررات رسمية وحمل الغير على الإدلاء بشهادة الزور وتعدد قضايا النصب.

هاد الشبكة كان خدا زعيمها البراءة خلال المرحلة الابتدائية وحتى الاستئنافية.. هاد الشبكة كان تجبد فيها النوطير لحمامصي عاود. المهم البراءة هادي قناعة المحكمة ماشي من حق حتى شي حد يهضر عليها او يعلق عليهاا، والكل كيحترم القرارات القضائية الصادرة باسم سيدنا وطبقا للقانون.

النيابة العامة والمطالبين بالحق المدني طبعا دارو الطعن بالنقض فهاد القرار الاستئنافي. دبا الملف غادي يتعرض على النقض.

“كود” مني قلبات على الملفات اللي عند هاد الموثق داخت. حسب مصادر “كود”، فإن السيد كان عندو عشرات الملفات بين محكمتي الاستئناف والابتدائية بفاس، غادي يتم الرجوع لبعضها لاحقا، وأغلبهم تحكمو، وفيهم اللي كان تطلق بيهم بكفالات بحال واحد الملف كان قاضي التحقيق بالمحكة الابتدائية طلقو بشي كفالة ديال 20 مليون وسد عليه الحدود والغرفة الجنحية نقاصت مبلغ هاد الكفالة، وهاد النوطير مشا فك شغلو مع الضحية اللي داعيه مني شاف راسو غادي يحصل.

فعدد من الهيئات كنشوفو او غير كتكون شبهة على شي جريمة كيتم التدخل بسرعة. هنا علاش هيئة الموثقين مزال مدارت خدمتها؟ تم يلا دارت خدمتها وفق الاختصاصات ديالها طبعا علاش كتعلنش على هادشي. اكيد كاين موثقين شرفاء وعددهم كثير لكن كاين اللي كيلطخ صورة هاد المهنة الشريفة لي عندها تاريخ عريق، وقال أحد الموثوقين: “هبة الموثق خاصها ترجع وبحال هاد الموثقين راه عدد محدود جدا بحال كيف كاين فباقي القطاعات”.

ضحية آخر لي كان داعي هاد النوطير لحمامصي طلب باش يكون شي تفتيش للمكتب ديالو من طرف النيابة العامة ويشرف الوكيل العام بنفسو على هادشي، وقال محامي في حديثه معه “كود” راه يلا قلبو على جميع الملفات اللي عندو ف القضاء غادي يلقاو لعجب.

الضوصي الثقيل لي دبا مزال ف النقض كانت غرفة الجنح الاسئنافية اعتبرت فيه اان الافعال اللي متورط فيها لحمامصي مع عدد من المتهمين هي جنح لكن النيابة العامة شافت أن تشكل جنايات والوكيل العام بالزربة طعن فهاد القرار جوج مرات، ودبا هاد الملف مزال تما ف النقض.

الضحايا كيلتمسو من محمد عبد النباوي الرئيس المنتدب للمجلس الأعلى للسلطة القضائية الرئيس الأول لمحكمة النقض يشوف من حالهم، ويصيفط حتى شي لجنة تشوف الملفات اللي عندو فاس، وكانت ملفات تم الحكم عليه بالحبس ولاحقا كياخد البراءة. أكيد كيف قلنا لا يحكم لأحد التشكيك فالمقررات القضائية أو يشكك في في قناعة القضاة لكن فقط حجم الملفات لي عند هاد النوطير بزاف.

ولي باين دبا ان الوكيل العام ففاس حرك المياه اللي كانت ناعسة فعدد من الملفات، منها ديال هاد النوطير اللي عندو جلسة جديدة عاود عند قاضي التحقيق بالغرفة الثالثة بمحكمة الاستئناف بفاس. نساينو حريرة هاد الموثق فين غادي تسالي.