آشنو وقع بالضبط فحي مولاي رشيد بكازا؟. شغب رياضي ولا صراعات بين بزنازة معروفين؟ صور كتصدم وصلات لـ"كود" وسط تضارب فالروايات .

كود ـ كازا//

أحداث العنف والروينة لي وقعات فحي مولاي رشيد بالدار البيضاء فالساعات الأولى من صباح البارح الأحد 10 ماي، مازال فيها ألغاز، وتضارب في الروايات.

توصلات “كود” بمعلومات كتفيد أن الهضرا لي كدور على الدراري لي تشدو فحي مولاي رشيد بسبب أحداث شغب رياضي، هوما في الأصل من عائلات ديال بزنازا معروفين في الحي.

وكتوضح هاد المعلومات أن الواقعة ممكن تكون مرتبطة بمضاربة بين عائلات معروفة بتبزنيز فأخطر أنواع المخدرات، وأن الأمور تطورت بسرعة وخرجات على السيطرة داخل الحي.

وكتزيد أنهم ضاربو على شكون غادي يحكم “لكروا” الشي لي خلاها مضاربة دامية بالجناوة ولفلامات.

مصدر الصورة

وفي سياق متصل، سبق لـ“كود” نشرات البارح معطيات رسمية كتفيد أن مصالح الأمن بمنطقة مولاي رشيد تدخلات فالساعات الأولى من صباح الأحد 10 ماي، وتمكنت من توقيف 3 أشخاص تتراوح أعمارهم بين 19 و24 سنة، للاشتباه في تورطهم في شغب رياضي وتبادل العنف، على خلفية مواجهات بين مجموعات ديال المشجعين ديال كرة القدم، تستعملو فيها جناوا ولقنبول صغير .

وحسب نفس المعطيات، تفتح بحث قضائي تحت إشراف النيابة العامة المختصة لتحديد جميع الملابسات والخلفيات ديال هاد الأحداث، مع استمرار التحريات لتوقيف باقي المتورطين.

ومن جهة أخرى، توصلت “كود” بصور من عين المكان كتوثق لحظات ما بعد المواجهات، وهي صور خطيرة وصادمة وهادشي لي خلا الناس تطرح تساؤلات على طبيعة هاد لمضاربة واشنو وقع بالضبط.

وبين رواية رسمية كتركز على “الشغب الرياضي”، ومعطيات كتحكي على صراعات خطيرة بين بزنازا، كيبقى السؤال المطروح هو: واش فعلاً أحداث ديال الكرة خرجات على السيطرة؟ ولا كاين خلفيات أخرى مرتبطة بصراعات بين أطراف إجرامية؟

القضية مازالت مفتوحة، والكلمة الأخيرة غادي يقولها البحث القضائي الجاري.