بتعليمات من سيدنا.. بدا تنزيل برنامج تأهيل المناطق المتضررة من الفيضانات بآسفي .

مصدر الصورة

أنس العمري -كود///

تنفيذا لتعليمات سيدنا، وباش يبدا التطبيق الفعلي للبرنامج الحكومي اللي كيهدف لإعادة تأهيل المناطق اللي تضررات من الفيضانات اللي عرفتها مدينة آسفي، نهار 14 دجنبر 2025، تدار، اليوم الثلاثاء اجتماع بمقر عمالة إقليم آسفي، خاص بلجنة قيادة هاد البرنامج، وجا مباشرة من بعد ما تصادق عليه مركزيا من طرف جميع المتدخلين.

هاد الاجتماع كيجسد الانخراط الحقيقي فتنزيل البرنامج على أرض الواقع، حيث تم تنصيب لجنة القيادة بشكل رسمي باش تشرف على تنفيذ الإجراءات المتفق عليها، وتنسق بين مختلف المتدخلين، وتتابع الأشغال، وتقيم النتائج ديال التدخلات الميدانية.

وخلال الفترة اللي فاتت، دارت اللجان التقنية المختصة إحصاء دقيق للمنازل والمحلات التجارية اللي تضررات من الفيضانات، وزادت دارت تشخيص شامل لحالة الطرقات، والشبكات، والتجهيزات العمومية، الشي اللي وفر معطيات مهمة تعاونت بها السلطات المحلية فإعداد البرنامج وتحديد الأولويات ديالو.

وفي نفس السياق، جرى خلال الاجتماع عرض لائحة الشركاء المتعاقدين وتوضيح الالتزامات ديال كل طرف، إضافة إلى تقديم تفاصيل حول محاور البرنامج، اللي كتشمل دعم إصلاح المنازل المتضررة، ومواكبة أصحاب المحلات التجارية باش يرجعو للنشاط ديالهم، وكذا دعم الباعة الجائلين اللي تضررو، عبر مشروع خاص لتثبيتهم حدا “باب الشعبة”.

البرنامج كيتضمن حتى إعادة تهيئة وتقوية الطرقات والمناطق اللي تضررات، وتنقية وترميم وتدعيم “الشعاب”، بالإضافة إلى تأهيل المراكز الاجتماعية وتنشيط القرب فالمدينة العتيقة، إلى جانب مبادرات إنسانية ودعم اجتماعي لفائدة الفئات المتضررة.

وفهاد الإطار، وبالوفاء لتوجيهات سيدنا، تأكد على ضرورة التعبئة الشاملة والتنسيق المستمر بين جميع المتدخلين، باش يتم تنزيل البرنامج بشكل فعلي ومنسجم ويعطي النتائج المرجوة.