شوكي كيهاجم خصوم الأحرار: المغاربة كيميزو بين اللي باغي يتصدر بالإنجاز واللي كيبني صورة زائفة على التصدّر .

مصدر الصورة

كود – أكادير///

فـرسالة انتخابية مباشرة لخصوم الحزب ديالو، وقبل أسابيع من الانتخابات التشريعية المقررة نهار 23 شتنبر، أكد محمد شوكي، رئيس حزب التجمع الوطني للأحرار، أن المغاربة قادرين يميزو بين اللي باغي يتصدر المشهد السياسي من بوابة الإنجاز والخدمة، واللي كيحاول، حسب تعبيرو، «يصاوب صورة زائفة باش يتصدر».

وقال شوكي، خلال تجمع تواصلي لحزب الأحرار، البارح السبت بمدينة أكادير، إن التنافس الانتخابي ما خاصوش يتحول لسباق لصناعة الانطباعات أو تقديم صور مسبقة على القوة، مؤكدا أن الحسم الحقيقي غادي يبقى بيد المواطنين اللي غادي يقولو كلمتهم فصناديق الاقتراع.

وشدد رئيس الأحرار على أن الحزب القوي «ماشي هو الحزب اللي كيتسنى الانتخابات باش يقلب على المجد»، وإنما هو الحزب اللي كيستثمر لسنوات فالتنظيم والعمل الميداني والقرب من المواطنين والإنصات ليهم، إضافة إلى الكفاءات.

وفهاد السياق، دافع شوكي على التجمع الوطني للأحرار، مؤكدا أنه «ماشي مجموعة ديال الأسماء تجمعات غير مع اقتراب الانتخابات»، وإنما حزب كيستثمر فالأطر والمناضلين ديالو وكيخدم على إعداد البرامج، معتبرا أن القوة ديالو كياخذها من الحضور الميداني ومن الثقة اللي قال إنها تراكمات على مدى سنوات من التواصل مع المواطنين.

وقال إن الحزب دار، حسب تعبيرو، «مئات الساعات ديال النقاش والإنصات والوضوح»، معتبرا أن الثقة السياسية «ما كتجيش فجأة»، وإنما كتبنى بالحضور المستمر والعمل والوفاء بالالتزامات.

وما فوتش شوكي الفرصة باش ينتاقد اللي اعتبرو توظيف للنقد السياسي خارج قواعد النقاش الموضوعي، محذرا من أن انتقاد الوزراء ورئيس الحكومة يتحول لاستهداف شخصي، ومعتبرا أن «التهريج» ما يمكنش يكون بديلا على مناقشة السياسات العمومية.

وأضاف أن التنافس بين الأحزاب على المقاعد الانتخابية ما خاصوش يتحول لسبب فإضعاف ثقة المواطنين فالسياسة، داعيا إلى الاحتكام للحصيلة والبرامج والبدائل، عوض الاكتفاء بالصراع السياسي.