اش هاد السيبة.؟.. فريق لاس بالماس دخل لسبتة من تطوان وهز لافتة فيها “سبتة ماشي للبيع “ ورجع قلع من طنجة على عينيك يا ابن عدي ! .

كود – علال الزمراني //

ما كاينش شي كلمة كتوصف هادشي اللي دار نادي “لاس بالماس” الإسباني من غير “الخبث” و”قلة النية” ،حيث الفريق الكناري جا للمغرب و استقبلناه فمطاراتنا، وفرنا ليه التسهيلات باش يدوز لسبتة يلعب ماتش دالكورة، وفاللخر، داروا لينا تخويرة سانك سانك.

https://www.facebook.com/share/v/1E7SAR4wS6/

القصة وما فيها، أن النادي الإسباني كان عارف راسو غادي يدير خطوة استفزازية ويمس بالسيادة المغربية فاش غايلبس تونيات مكتوب فيها «سبتة ماشي للبيع، سبتة غادي ندافعو عليها». ولكن حيت هما خوافين وعارفين راسهم غالطين، خدموا لقوالب مني علنوا فالإعلام باللي تراجعوا على الخطوة حيت خايفين من “مضايقات” فالمغرب وهادا الطعم لي صرطاتو حتى بعض الوسائل الإعلامية المغربية.

فريق لاس بالماس تظاهروا بالبراءة والحياد حتى دخلوا وامنوا راسهم، وفاش وصلوا للملعب، لبسو دوك تونيات المستفزين ورجعو ماتش كروي “كلاش سياسي“، هادي كتسمى “قلة النية” لي كتعكس العقلية الاستعمارية اللي باقي عايش فيها هاد النادي ومسؤوليه،أما الرئيس ديال الفريق لبدها حتى وصل لسبتة وقال”حنا غادي نعبرو على موقفنا ولي بغا يطرا يطرا يشدونا ولا يوقفونا فالرجوع“

مصدر الصورة

الصدمة الكبيرة هي التساهل ديال السلطات المغربية، كيفاش فريق مورا هادشي لي دار كيرجع يدوز من قدام عينيك وكتخليه يدوز “بسلام وبلا أي مشاكل” ؟

السلطات المغربية، وخصوصاً فإجراءات الخروج، كان خاصها تبين “العين الحمرا” على الأقل، كان خاص يكون تفتيش مزير ومعقد،و روطار روتيني فالإجراءات، والتزيار فالمراقبة وتجريرة حتى مايلقاو طواليط فين يبولو، باش يعرفوا باللي السيادة المغربية ماشي ضحك، واللي بغا يلعب السياسة فالتيرَان، يخلص الثمن فالديوانة والمطار.

هاد “الظَّرَافَة” الزايدة والتساهل فمواقف بحال هادي كيتفهم من الطرف الآخر كضعف، وكيشجعهم باش يعاودوها كل مرة كيف ما وقع لينا فالكان، حيث الكورة ماشي غير جلدة منفوخة بالريح وإنما وسيلة ديبلوماسية، وفاش كيستغلها الخصم باش يضربك فبلادك، خاص الرد يكون قاصح ،الصبليون بينو على وجههم الحقيقي ، وخا مشينا معهم بالنية ديال ركراگة ،ولكن هاد المرة، اللومة على المسؤولين ديالنا اللي كان خاصهم يقصحو اللعب مع هاد النماذج حيث السيادة الوطنية خط حمر ما فيهش تساهل.

وحتى إيلا بغينا نمشيو مع الطرح اللي كيقول باللي السلطات المغربية “تسامحات” فإجراءات الخروج حيت ما بغاتش تطيح فالفخ ديال الإعلام الإسباني وتصدر ليهم دور “الضحية”، فكان خاص يخرج بيان كيشرح هاد الخبث الإسباني للعالم، ويكون بلاغ كيدين الاستغلال السياسي للرياضة، وكيوجه رسالة واضحة باللي المغرب ترفع على الرد بـ “أساليب ديال دراري الصغار” فالمطار حيت البلاد كبيرة على هاد الفعايل.