جوج امور طاح فيهم بنكيران. نسى مغربية سبتة ومليلية فخطاباتو وهاجم الفن بشعبوية وباش كان حزبو فالحكومة 10 سنين دعم هاد المهرجانات اللي كيسب فيهم اليوم ورافض العلاقات الرضائية اللي معمول بها فالمجتمعات المتطورة اللي كيحلم يكون بحالها .

مصدر الصورة

كود سعيد الشاوي ///

خطاب بنكيران عبد الاله امين عام حزب العدالة والتنمية فهاد الانتخابات كاين فيه شق سياسي كيهاجم فيه البام وكيتاهم بالحزب الفاسد وكيطالب بمحاكمة رئيس الحكومة الحالي وكيخلع الناس تصوت على هاد جوج الاحزاب. هاد الشي مقبول سياسيا. بذهاؤو السياسي واخا عارف راسو ما رابحش الانتخابات التشريعية، كيسوق قدام الانصار ديالو سوا فالناظور او الدريوش…. باللي غادي يجي اللول. طبعا عليها كيهاجم اللي هو عارفهم غاديين يربحو الانتخابات.

هاد الخطاب السياسي كان يكون فعال كون لمغاربة ما جربوش حكومة برأس هاد الحزب ل10 سنين. حتى فهادي لاحظنا ان بنكيران لاول مرة فخطابو الاخير كيقول باللي هو هو والعثماني العثماني. كيقول للمغاربة ما تحاسبونيش على 5 سنين ديال العثماني بطريقتو طبعا

تركيزو على لحريك الجماعي لسبتة يوم عيد العرش 30 يوليوز 2026 اسلوب ذكي منو. شرحو لمبررات سؤالو للملك ماشي طلبو كيف قال، باش يدير لجنة تحقيق فاللي وقع وباللي مازال كيتسنى الجواب واخا كيحتارم المقام، مقبول سياسيا من زعيم كيعرف الملك مزيان لانو كان رئيس الحكومة لمدة 5 سنين. طبعا كاين اللي انتاقد الاسلوب ديالو. بنكيران رد باللي ما يمكنش لشي حد يوريه كيفاش يهدر مع الملك. باختصار كيؤكد باللي كيحتارم الدستور والتقاليد المرعية. فزمن انتخابي احداث سبتة تقدر تكون عامل مساعد تربح بيها الانتخابات، عليها كيركز عليها.

لكن فهاد التوجه العام ديال رئيس الحكومة الاسبق، طاح فجوجت الامور.

1:
مغربية سبتة ومليلية
ما استغلش تواجدو فالناظور باش يكون اول زعيم حزبي فشي تجمع قبل بدء الحملة الانتخابية يهدر على مغربية سبتة ومليلية. تكرار الحديث على اللي وقع فسبتة مزيان ولكن التشديد على مغربية هاد المدينتين مهم بزاف.

كان حدا مليلية المحتلة وما قال حتى كلمة على احتلالها. حتى كلمة على مطالب حزبو باسترجاعها. هادي زگلها بنكيران

2:
المهرجانات مهمة للحياة وحزبكم دعمها باش كان فالحكومة والعلاقات الرضائية ماشي حيوانية
سقطة اكبر دارها بنكيران هو باش استغل تواجدو مع انصارو المحافظين اللي فيهم عدد متطرف فقضايا معينة خاصة كل ما عندها علاقة بالفن بالجسد بالحرية، باش هاجم المهرجانات. هادي عادة متأصلة فهاد التيار الاصولي. بلا ما نهدرو ولا ندافعو على الفن، راه لمغاربة بحضورهم اللي كيفوق فسهرة للستاتي فموسم مولاي عبد الله 300 الف جواب هاد التيار، لكن نشوفو باش كانو 10 سنين فالحكومة كيرأسوها ماشي غير مشاركين فيها، واش عمر بنكيران او اللي جا من بعدو العثماني، حيد الدعم للمهرجانات الفنية والسينمائية؟ ابدا. اذن علاش هاد الشعبوية قدام ناس الدرويش تسب وتهاجم مهرجانات انت كنتي كتدعمها ولكن فخطاباتك اليوم كتهاجمها.

اللي كيمرض الاسلاميين كلهم من سلفييهم لاخوانييهم هي الحرية. عليها باش بنكيران جبد العلاقات الرضائية فالدرويش، بسطها بغباء كبير ما معروفش عليه، باللي بغاو يرجعو المجتمع بحال لكلاب. اولا هاد الحيوان وفي وزين بزاف وعندو قيم كثر من عدد من الادميين، ثانيا كاع المجتمعات المتقدمة اللي كتحلم توصلها، عندهم العلاقات الرضائية ما كيدخلش فيها لا القانون لا المجتمع. هادوك اللي قطعو لبحر لسبتة المغربية راهم طامعين يوصلو لاوربا باش يعيشو فمجتمع ماشي غير العلاقات الرضائية، حتى العلاقات المثلية. يكون جسدهم حر وفهاد الحرية كيكون الاقتصاد مزيان والنمو طالع والمعيشة محترمة. باراكا من بيع الوهم للمغاربة وفرض الوصاية عليهم. كاينين مغاربة عايشين هاد العلاقات الرضائية واخا كيعاقب عليها القانون وما يمكنش ليك لا انت لا حزبك لا تيارك السياسي يوقفو هاد لشي. العلاقات الرضائية غاديين نوصلو ليها مع وزير العدل وهبي للي كيدير خدمة واعرة كيف غاديين نوصلو لحرية المعتقد غدا او بعد غدا