ديرها الانتخابات.. كلاشات بين بامي وعضو من الأحرار فالدورة الاستثنائية لجماعة كازا بسبب " تسييس" الملفات.. وكلايبي لـ "كود " : ماكنسيسوش المواضيع والوعاء العقاري ديال 8 هكتارات لي نايض عليه الصداع خاصو يتحل باش المشاريع ماتبلوكاوش .

أميمة عطية – كود كازا ///

ناضت، هاد صباح الاثنين 17 غشت، كلاشات فالدورة الاستثنائية لمجلس جماعة الدار البيضاء، بعدما دخل كريم كلايبي، عضو المجلس عن الأصالة والمعاصرة، فجدال مع عضو من فريق التجمع الوطني للأحرار، على خلفية اتهامات بـ” تسييس” المواضيع اللي كتناقش داخل المجلس.

وجا هاد النقاش بعدما طالب كلايبي بتوضيحات بخصوص ملف إحداث فضاء سوسيو، وكال إن الملف سبق تطرح مع العمالة، قبل ما يخبروه بأن الوعاء العقاري ماشي ديال لجماعة .

مصدر الصورة

ومن جهتو، تدخل عضو مجلس مقاطعة عين السبع عن فريق الأحرار، وكال إن السياسة ماشي بلاصتها فمجلس جماعة كازا ، وإن هاد الفضاء خاصو يبقى مخصص لمناقشة المواضيع اللي كتهم الكازاويين.

وفهاد السياق، وفتصريحو ل ” كود” ، كال كريم كلايبي لبامي ونائب رئيس مجلس مقاطعة عين السبع ان البحث اللي دار من بعد بين، حسب المعطيات اللي قدمها، وجود 8 هكتارات من العقارات التابعة للجماعة وسط كازا، مشيرا إلى أن عين السبع والحي المحمدي كيعانيو من خصاص فعدد من المرافق والتجهيزات.

ومن جهة اخرى ، طالب لكلايبي من عمدة كازا ، نبيلة رميلي بتدخل بزربا لتسوية وضعية الأوعية العقارية، باش تتخصص للمشاريع اللي محتاجة ليها الساكنة، ومايبقاش مشكل العقار سبب فبلوكاج مشاريع فكازا.

وفالرد على اتهامو بتسييس لملفات، كال كلايبي إن فريق الأصالة والمعاصرة ماكيسيش هادشي وبلي كيناقشو هادشب فالأوف ، مشددا على أن لهضرا على هاد الملف الهدف منها هو ايلقاو حل لمشكل مطروح، حسب قولو، عامين هادا .

وزاد ضاف ، أن النقاش خاصو يركز على إيجاد أوعية عقارية للمشاريع، باش مايبقاوش المشاريع مبلوكين بسبب مشكل الملكية أو غياب العقار.