مندوبية السجون كذبات اشاعة التعذيب وسوء المعاملة: عدد محابسية "جيل زيد" واصل لـ662 وكنتعاملو معهم بحال الجميع و108 منهم كيقراو .

مصدر الصورة

عمر المزين – كود///

متعطلاتش المندوبية العامة ديال إدارة السجون وإعادة الإدماج باش ترد على داكشي لي كيتم الترويج ليه بخصوص تعرض محابسية احتجاجات “جيل زيد” المعتقلين على خلفية الاحتجاجات اللي عرفاتها بعض المدن المغربية لـ”التعذيب وسوء المعاملة” وحرمانهم من العلاج والكتب، وظروف اعتقال وصفت بغير الإنسانية، وحتى الادعاء بلي كيتحطو مع سجناء متابعين فقضايا خطيرة.

وقالت المندوبية، فبلاغ توصلات به “كود”، إن عدد هاد السجناء دابا وصل لـ662 سجين موزعين على 52 مؤسسة سجنية، وكيتعاملو معاهم بحال جميع السجناء الآخرين، وكايستافدو من جميع الحقوق اللي كيضمنها القانون، من بينها العلاج، والزيارة، والفسحة، والتوصل بالكتب، والتبضع من المقتصدية.

وزادت المندوبية أن 108 منهم كيتابعو الدراسة أو التكوين المهني، منهم 13 فالجامعة، و20 فالثانوي، و40 فالإعدادي، و6 فالابتدائي، و29 فالتكوين المهني.

وبخصوص الادعاء بلي كيتحطو مع سجناء متابعين فقضايا خطيرة، أوضحت المندوبية أن توزيع السجناء كيكون حسب معايير قانونية، مشيرة إلى أن 567 منهم متابعين فجنايات و95 فقضايا جنحية.

أما بخصوص السجين (م.خ) المعتقل بالسجن المحلي عين السبع 1، فنفات المندوبية بشكل قاطع تعرضو لأي اعتداء أو مضايقات، مؤكدة أنه ما سبقش ليه قدم أي شكاية بهاد الخصوص، وأنه كيتلقى الرعاية الطبية كلما احتاج ليها.

كما نفت المندوبية الادعاء المتعلق بتعرض أحد السجناء لاعتداء بسبب خلاف على استعمال الهاتف، مؤكدة أنها ما توصلات حتى بمعطى كيثبت هاد الواقعة، وأن أي مخالفة كتوقع داخل المؤسسات السجنية كيتعامل معاها وفق القانون، وكتتخذ لجنة التأديب العقوبة المناسبة حسب خطورة المخالفة.