المخازنية حبسو مسيرة فيها المئات خارجين من فيلاجات أنمزي وأكديم كانو قاصدين عمالة ميدلت .

كود -ميدلت//

منعات القوات العمومية، نهار الجمعة 26 يونيو 2026، مسيرة احتجاجية ديال سكان عدد من الدواوير التابعة لجماعة أنمزي وأكديم فإقليم ميدلت، فالدخلة ديال مدينة تونفيت، مني كانت قاصدة عمالة ميدلت باش توصل المطالب ديالها للسلطات.

وحسب المعطيات ، السلطات حبسات المحتجين فالدخلة ديال تونفيت، اللي كانت غاتكون نقطة تجمع للسكان المشاركين فالمسيرة، فانتظار التحاق وفود أخرى جاية من دواوير آيت عمر وآيت فضولي باش يكملو الطريق لمدينة ميدلت.

مصدر الصورة

هاد المسيرة بدات نهار لاربعا اللي فات، وشارك فيها سكان عدد من الدواوير التابعة لجماعتي أنمزي وأكديم، مني قطعو كيلومترات طويلة على رجليهم وباتو فالطريق، باش يوصلو صوتهم ويطالبو بتحسين الأوضاع المعيشية فالمنطقة.

المحتجون كيقولو بلي المطالب ديالهم ساهلة ومشروعة، وكتتمثل ففك العزلة على الدواور ديالهم و صليح الطريق وربطها بالشبكة الطرقية، وتوفير الريزو، واستعمال المواد المحلية فالبني.

وأكدات الساكنة أن قرار تنظيم المسيرة جا من بعد سنوات ديال المطالب والشكايات والمراسلات للجهات المعنية، بلا ما يتحقق والو على أرض الواقع.

وضمات المسيرة مشاركين من دواوير أكديم وبوتسرفين وتاكوديت التابعة لجماعة أكديم، عاد دواوير أنفكو وترغيست وتغدوين وأغدو وتمالوت وأنمزي وآيت مرزوك التابعة لجماعة أنمزي، والهدف ديالهم كان هو فتح حوار مع المسؤولين والاستجابة للمطالب التنموية اللي كتشوف الساكنة أنها ضرورية باش تسالي العزلة وتحسن ظروف العيش فالمنطقة.

وبعد لقاء تم بين المحتجين والسيد العامل فنفس النقطة لي تلاقاو فيها القبائل،تم إقناع المحتجين بالرجوع فوق الترونسبور لي جابتو العمالة، بِينما يكمل الحوار بين المحتجين و العامل لي تافقو عليه.