مشهد فيه بزافت الانتهازية. باراد افتتاح مهرجان الصويرة تحول بحال شي مشهد مسرحي. قيمتك كتحدد فالصف اللول حدا اندري ازولاي المؤسس لجمعية ومؤسسة الصويرة-موكادور. بفضل هاد الجمعية قدرات الصويرة تخرج من التهميش. خاض ازولاي حرب كبيرة باش يوقف المهرجان على رجلو ولكن ما كانش يتوقع انو خاصو ياخذ حرب داخلية بعد ما سطات شركة “أ 3” للتواصل على الانتاج ديال هاد المهرجان.

الباراد ديال هاد الدورة اللي بدات البارح ولى فالسنوات الاخيرة باراد لصاحبة هاد الوكالة نايلة التازي. كتبندد فالصف الاول. كتسابق مع ازولاي ولد الصويرة باش تخطف الاضواء.

لان عندها الانتاج ديال المهرجان فنايلة التازي كتحول دورات المهرجان لمناسبة تعرض على صحابها وصحاباتها وزبانيتها وحوارييها. كلشي فيه باش يمجدو دور هاد السيدة اللي تقلقات هادي سنوات باش سيدنا وسم عدد من ابناء الصويرة وما تسوقوش ليها.

الدولة ما كتلعبش عارفة شكون كيخدم لمدينة وشكون كيخدم مصالحو الخاصة. بالفعل بعد الدورات ولات هاديك الوكالة اللي أسسوها 3 سيدات وولات فاللخر فيها غير نايلة التازي، كارط فيزيت ليها. قدرات تدخل للباطرونا فعهد صاحبتها الرئيسة السابقة مريم بنصالح ودارو ليها فيدرالية الصناعات الثقافية والإبداعية وخدات الرئاسة مع المرحوم الرتناني عبد القادر. دابا كاين يونس بومهدي وفهر الكتاني. ديما تلقى شي فاسي مهيمن على الباطرونا وعلى فيدرالياتها.

قدرات التازي بدعم صحابها وحوارييها اللي كتعرض عليهم كل عام للمهرجان باش تدخل لمجلس المستشارين باسم الباطرونا. باش تعرف ان همها دافع على مصالحها تقاتلات باش تزيد ولاية ثانية وضاربات باش تاخذ الرئاسة فلجنة فالخارجية. طبعا الرئاسة فيها الطونوبيل وامتيازات اخرى.

دابا ولفات وباغية تاخذ ولاية ثالثة. خاص هاد الباطرونا يحشمو على عراضهم. يديرو ميثاق بيناتهم باش ما يتحولش عضو فمجلس المستشارين الى منصب دائم.

طبعا مهرجان الصويرة خرج للوجود بفضل كتاب دارتو كاتيا برامي زوجة اندري ازولاي. كان هو البداية لهاد المهرجان الرائع. كتبات بنت الصويرة كدافع على مدينتها.

اليوم باش تتكلم نايلة التازي على الثقافة راه ماشي حب فيها. قضايا الشباب والحرية والهوية والمستقبل غير كلام وصافي. باش تسمع شي حد كياخذ المناصب وكيتمنى كثر وكيكرر باللي “اتساع الفوارق الاجتماعية كيمثل أحد أبرز أسباب تنامي مشاعر فقدان الثقة” وباللي “الإقصاء الاجتماعي لا يقل “خطورة” عن الفجوة بين الأجيال” عرفو راه غير طريقة باش يوسع مصالحو ماشي يقضي على الفوارق الاجتماعية