اللي دارها بيدو يفكها بسنو... هما شفرو ودابا باغيين مساعدة: قصة جوج طلبة حصلو فروسيا ودابا: سيدنا عاوننا .

مصدر الصورة

كود – كازا //

وجهو جوج طلبة مغاربة كيقراو فروسيا نداء للمسؤولين المغاربة والرأي العام، ميعاودو فيه على المعاناة اللي كيدوزو منها من شهور بسبب قضية قضائية خلات حياتهم تتقلب ساس على راس .

الطلبة قالو باللي فشهر أبريل تفاتحات ضدهم قضية كتعلق بسرقة سلعة من محل تجاري بلا ما يخلصو الثمن ديالها، بقيمة كتقارب 7500 روبل روسي ،وأكدو أنهم ما كينكروش اللي وقع، واعترفو بالغلط ديالهم وعبرو على الندم الكبير كيف ما قالو أن الحادث وقع فظروف مالية ونفسية صعيبة كانو كيدوزو منها.

وحسب الرسالة ديالهم، فهم ما عندهم حتى سوابق جنائية ولا مخالفات سابقة، وجاو لروسيا بطريقة قانونية باش يكملو قرايتهم الجامعية ،كما أكدو أنهم تعاونو بشكل كامل مع السلطات الروسية، وحضرو جميع الجلسات القانونية، وخلصو القيمة كاملة ديال السلع اللي كانت موضوع القضية.

وخا هاد الشي، مازال الملف ما تسدش بسبب عدة تأجيلات، وهو الأمر اللي زاد من الضغط النفسي وعدم الاستقرار اللي كيعيشوه يومياً.

وزاد الطلبة قالو أنهم حاولو يتواصلو مع السفارة المغربية فموسكو باش يستافدو من المساعدة القنصلية بلا ما يوصلو لحتى نتيجة، حيث كيقولو أنهم ما توصلوش بأي رد على المراسلات ديالهم.

وفوق المشاكل القانونية، كيعانيو حتى من أزمة مالية ، خصوصاً مع صعوبة التوصل بالتحويلات المالية من المغرب لروسيا، الشي اللي خلاهم يواجهو صعوبات فتوفر الحاجيات الأساسية ديال العيش.

وأكدو الطلبة أن الوضع النفسي ديالهم ولى صعيب بزاف، وأن الحلم ديالهم اليوم ما بقاش هو إكمال الدراسة أو الاستقرار فروسيا، وانما يرجعو للمغرب ويمشيو هاد الصفحة الصعيبة من حياتهم.

كيف ما طالبو وزارة الشؤون الخارجية والتعاون الإفريقي والمغاربة المقيمين بالخارج بالتدخل ومواكبة وضعيتهم وفنفس
الوقت وجهو حتى نداء لسيدنا باش يدخل.