خبير اقتصادي لـ“كود”: المازوط غادي يرفع ثمن البهايم هاد العام.. والشتا ممكن تقلب الموازين فالسوق .

كود كازا//

كلنا عارفين بلي ثمن المازوط اللي وصل تقريباً لـ15.50 درهم للتر، مؤخرا دار روينة في غلاء الأسعار ومبقاش المواطن المغربي قادر على ديك القفة ليومية بحسب شهادات كتيرة .

وهنا كيبان بوضوح أن كلفة ديال النقل والتوزيع ولات واحد من أبرز العوامل اللي كاتضغط على أسعار لبهايم حتا هي فالسوق، خصوصا مع اقتراب موسم الأضاحي ولعيد ، اللي كيزيد فيه الطلب وكتكبر فيه حساسية الأسعار، حيت لمغاربة تقول عمرهم كلاو اللحم وكيتسناوه غير باش استمتعو به ، كود سولات على فين كيتجلى تأثير لغلا دلمازوط على لبهايم هاد لعام ؟ واقتصاديا كيف غادي تكون الأمور ؟

وفي هذا السياق، قال أمين سامي، خبير ومستشار دولي في الاقتصاد والتخطيط الاستراتيجي والمالي، في تصريح خاص لـ“كود”، إن “المعطيات الحالية كيبانو بلي تطور أثمنة لبهايم هاد لعام ما يمكنش نفسروه غير بالارتفاع ولا نقصان، ولكن هو نتيجة ديال توازن بين جوج عوامل رئيسيين.

مصدر الصورة

وأضاف الخبير أن “من جهة كاين استمرار تأثير تكلفة لمازوط لي أثر بشكل مباشر على النقل والأعلاف، ومن جهة أخرى كاين تحسن واضح فالأحوال المناخية بسباب الشتا لصبات فبلادنا ، اللي ساهمات فانها نعاود تحيي لفلاحة وتحسن وضعية البهايم الوطنية”.

وأوضح أن هاد التفاعل كينتج “وضعية قريبة للاستقرار النسبي ولكن فيها تفاوتات بين الجهات”، حيت بالنسبة ليه كتختلف الاثمنة حسب “كلفة اللوجستيك والنقل ، وتوفر لكوريات ديال لبهايم ، وقرب مناطق الإنتاج من أسواق الاستهلاك”، مؤكداً أنه “ما يمكنش نختزلو السوق فاتجاه واحد لأنه كيتشكل من توازن بين الضغط ديال بشحال غادي إتقان النقل والتنقل وتحسن العرض الفلاحي”.
وشار المتحدث نفسه إلى أن سوق كيعكس “دينامية اقتصادية واجتماعية أوسع”، بما انه باقي كلفة الطاقة كتأثر بشكل مباشر على مختلف سلاسل القيمة، في حين كتواصل الفلاحة لعب دور مهم فالتخفيف من حدة التضخم ودعم القدرة الشرائية سواء فالعالم فلعروبية أو فالمدينة .
وختم تصريحه بالتأكيد على أن “السوق كيتجه نحو توازن مرن كيتحكم فيه منطق الإنتاج والطلب أكثر من التوقعات الظرفية”، وشدد على أهمية “تحسين سلاسل التوزيع ورفع الإنتاج باش نضمنو استقرار أكبر فالمستقبل