راعي كنيسة المجد بتمارة لـ“ كود“ بخصوص الغاء حيادية لامبيلانص: حتى حنا كمسيحيين من حقنا نموتو مدام كنخلصو الضرائب والواجبات .

مصدر الصورة

كود – كازا //

فتصريح خص به جورنال “كود” تيقول آدم الرباطي راعي كنيسة المجد بتمارة ورئيس الاتحاد المسيحي المغربي، أنه تفاجأ بالتراجع على قرار الغاء حياد سيارات نقل الأموات، وخا كنا كنعتابرو ان هاد القرار ديمقراطي وكيحترم جميع المغاربة بغضّ النظر على الدين ولا اللون ولا الأصل.

كيف ما كيضيف “راعي كنيسة المجد“ بلي خاص وزارة الداخلية ووزارة الصحة يشرحو للمغاربة أنه ماشي غير المسلمين بوحدهم لي كيموتو فهاد البلاد، راه حتى حنا كمكونات دينية كنموتو وعندنا حقنا كمواطنين، حيث كنخلصو الضرائب للدولة.

أما الرضوخ للضغط ـ كيضيف ادم ـ فكيعطينا صورة على واحد النخبة دينية فالمجتمع المغربي كتشوف بلي هي وحدها لي من حقها تموت، عكس حنا المسيحيين لي كيضهر بحالا ما منحقناش نموتو ولا من حق الدولة تعامل معنا وتحمينا كمواطنين كيفما كتصور هاد النخبة الدينية .

كيزيد يقول رئيس الاتحاد المسيحي المغربي ان هاد الفكر العنصري كيحتم على الدولة تجتهد وتشرح للناس أن المواقف لي كتاخدها هي قرارات ديمقراطية كتشجع على التسامح الديني ،وهاد القرار لي كنا كنعتابروه كمسيحيين مغاربة ديمقراطي ميمكنش ينتهك حقوق المسلمين حيث هما الأغلبية، ولكن ما خاصناش نساو بلي كاينين مكونات دينية كتأدي الواجبات ديالها وكتخلص الضرائب ومن حقها حتى هي تستافد من الخدمات ديال وزارة الصحة.

وكيسالي “ آدم الرباطي“ كلامو بالقول أن التراجع على هاد القرار ما غادي يزيدنا غير إصرار على العمل وتوعية المجتمع المغربي، وفتح برنامج نقاش عمومي لي كان من المفروض جميع المكونات الدينية ترحب بهاد القرار وأولهم رجال الدين لي خصهم يتميزو فالقرن 21 خاص بالحس الحقوقي باش ما يكونوش عائق لتطور المجتمع.