جيفري ايبستين والمسلمين.. بزاف ديال ادعاءات الطهرانية، وبزاف ديال قلة الفهامة .

مصدر الصورة

فاطنة لويزا ـ كود//

الملف ديال جيفري ايبستين واحد من الملفات لي كيزيد يأكد لي بلي هاد أمة الإسلام في وضعها الحالي أمة ديال المهزومين.

في الوقت لي الصحافة العالمية دايرة جهدها تلقى شي حاجة فدوك آلاف الإيمايلات لي خرجاتهوم وزارة العدل، ومئات الوثائق المرافقة ليها، فأمة محمد مهتمة غير بإثبات وهمي لخرافة أن المسلمين مزيانيين والغرب ما فيه غير المجون وقلة العراض.

الناس في أوروبا وأمريكا طالع ليها الدم أن أغلب هاد الوثائق حيدو منوم الأسماء ديال المتورطين في الاعتداءات الجنسية، وخلاو الأسماء ديال الضحايا.

مزال الواحد يفهم أن الإخفاء المؤقت ديال أسماء المتورطين، كيدخل في إطار مبدأ أن المتهم بريئ حتى تثبت إدانته، واخا هي ما صحيحاش فهاد لافيغ، حيت التورط في الاعتداءات الجنسية فشلا إيمايلات وصور ووثائق واضح وضوح الشمس في نهار جميل، وحيت شحال من قضية اعتداء جنسي تورطو فيها المشاهير وكانت كدوز حتى في الإعلام المتطرف في تطبيق قواعد أخلاقيات المهنة بالأسماء والوجوه.

ولكن الواحد في أمريكا ولا فأوروبا تصدم من ترك أسماء الضحايا مكشوفة، وناضت روينة، أدت إلى أن الوثائق لي تنشرات من بعد، تحيدات منها أسماء الضحايا، وتم الاعتذار ليهوم.

واليوم الضحايا لي غيمشيو للقضاء، عندهوم الاختيار بين كشف الهوية ديالهوم، وبين إخفاءها.

حنا مزال عندنا الضحايا ديال الاعتداءات الجنسية كنشهرو بيهوم، مع العلم أن آليات الحماية القانونية والاجتماعية ديالهوم ضعيفة. ويجي يقوليك حقا ما حقا الغرب حيواني.

قضية أخرى هي ديال القاصرين والقاصرات، هنا مخي كيحبس.

كيفاش عندك واحد بحال ديك الإيكونوميست اللحية ديال لحلو، كيبيح زواج القاصرات، وكيفاش عندك أطنان ديال الكتل اللحمية السلفية كتزوج بناتها القاصرات بالفاتحة، وكيفاش عندك شلا شطابات فالوجوه كيديرو دروس كيتفننو فيها فالإساءة للنبي، عبر حكاية عائشة لي كان فعمرها 9 سنين كيما كيقولو هوما، وكيفاش وحدين لي خرجو ضد مقترحات منع تزويج القاصرات، واعتبروها هجوم على دين الله، ودابا بلا حشمة بلا حيا، سايرين يقولو شوفو الغرب كيستغل القاصرات.

فهاد الغرب أ باللحية لاخور، حتى حد ما خرج وقال هادشي مزيان، اعتبروه جريمة، وكاين لي مشا بعيد واعتبرو جريمة ضد الإنسانية، والتوصيف القانوني ديالو هو الاتجار في البشر.

مخرجش حتى واحد يقول: إيوا زوجوهوم بهادوك لي تعداو عليهوم. بحال مكيقولو عندنا هنا.

هاد اللعيبة تشد ففضيحة جيفري إيبستيين، باش دير مقارنة بين الأمة الإسلامية والغرب ما شداش، بل مضحكة، حيت لا التاريخ الإسلامي، ولا الواقع الحالي ديال المسلمين غادي يعاونيك.

البيدوفيليا موجودة في العالم الإسلامي كلو، حتى طالبان مقدراتش تمنعها فأفغانستان، من كثرة انتشارها تما، زيادة على الغلمان.

وفاش ندويوه مثلا على الغلمان والبيدوفيلي فبعض المجتمعات الإسلامية، فكندويو على ثقافة مجتمعية، ماشي على جريمة او شبكة منظمة خارج القانون، وهادا فرق كبير.

وهادا لي خاص يفهموه أصحاب شعار: يا شباب العالم المحمدي.

شبكة جيفري ايبستيين صدمات الميريكانيين والأوروبيين اكثر منا، حيت ديك الثقافة ديال البيدوفيليا والاغتصاب ثقافة مرفوضة في المجتمع، والناس كيعتبرو انها شكل من أشكال الهمجية.

مجتمعات كترفض حتى العائلة تبوس طفل صغير فحناكو، وكترفض راجل يحط يدو على زميلة فالعمل.

فضيحة شبكة جيفري ايبستيين ماشي قضية أخلاقية بالدرجة الأولى، هي قضية سياسية.

هي شبكة عابرة للقارات، ماشي لتقديم خدمات جنسية في مقابل الفلوس.

أبدا.

جيفري إيبستيين ماشي قواد، هو أكبر من ديك الشي، هو باطرون شبكة ديال ابتزاز مسؤولي دول، ورجال أعمال كبار. وهاد الابتزاز ماشي الغرض منو الفلوس،

جيفري إيبستيين شابع لعاقة، وهو أصلا واحد من كبار رجال المال والأعمال في العالم.

ماشي مسالي قبو باش يدير شبكة ديال القوادة يبتز بها المرفحين مقابل المال.

لا.

هادشي شبكة ابتزاز مقابل تغيير دول لمواقفها، من أجل الحصول على صفقات واستثمارات في دول، من أجل تغيير ولاءات واصطفافات.

شبكة استطعات تأثر فتصويت دول داخل مجلس الأمن، وتبدل اتجاه صفقات تسلح من دولة او شركة لأخرى.

لعب كبير بزاف أبن عمي.

واليوم طاحت، هي لي موفرين للشبكة الحماية، غما تخلاو عليها، او بريوسهوم جات الوقيتة ديالهوم، وكان انكشاف الشبكة هو الوسيلة للتخلص منهوم.

وغذا طاحت شبكة جيفري، فكاينة شبكات أخرى مزال خدامة.

واش صحابليكوم العالم هو لي كنشوفوه فالسطح.

وحتى عندنا فالبلدان العربية والإسلامية كاين شبيبيكات بحال هادي، ولكن كتلعب غير فالصغير، صور شي مول الأرض مثلا باش تهرفلو عليها.

غير لي خاص الواحد يفهم، انهم واخا خرجو شلا وثائق، مزال مجموعة ديال المتورطين كيتمتعو بالحماية، ومزال لاعبين لعب خايب، وهو تعويم النقاش والفضيحة.

حيت كان خاص فقط ينشرو الإيمايلات لي عندها العلاقة مباشرة بالجرائم، هوما لا.

نشرو الإيمايلات كلها ديال السيد والناس لي كانو كيعاونوه.

وبالتالي الصحافة لقات راسها مع آلاف الوثائق ليأاغلبها بلا قيمة.

وهادشي خلا الصحافييين لي خدامين على هاد الدوصي يدخلو فواحد النوع ديال الإرهاق.

تصور انه تقد تخدم سيمانة كلها على آلاف الإيمايلات وكلها تطلع معندها قيمة.

وهادشي كان مقصود، باش يعومو النقاش.

ونسبيا نجحو فهاد الأمر، نجحو انهم يخفيو أسماء المتورطين الحقيقيين في الجرائم الجنسية، وفي عمليات الابتزاز.

في الوقت لي الإيمايلات لي مافيها حتى شبهات، او صور ما كتفيد بوالو، خلاوها، وحتى محادثات معندهاش شي قيمة كبيرة، حتى هي خلاو الأسماء، كيما وردات في المحاضر ، وهادشي غادي يخلي ان الناس لي ما متورطة فحتى حاجة، هي للي واكلة العصا.

تشومسكي مثلا، مكاين حتى حاجة كتدينو، ولكن حيت كان مشا لديك الجزيرة بدعوة من جيفري إيبستيين، الناس كدوي بحالا السيد ما عرفناش أش دار، في حين الجزيرة ما كانتش 24 ساعة على 24 ساعة فيها غير الخلاعة والمجون، راه كانت جزيرة عادية في ملكية واحد مرفح، حتى كيبغي يدير فيها ديك حفلات الجرائم الجنسية عاد كتحول الوظيفة ديالها، راه شحال من مسؤول عالمي مشا ليها ومدار حتى حاجة، ولا كان عارف أش كيطرا فيها.

شحال من صور خرجو، معندوهم حتى معنى، بحال صورة عمدة نيويورك الحالي فاش كان صغير مع ماماه، ومع جيفري إيبستيين وشي حد آخر، وبنادم كيقول مو كانت كتقود بيه على ديك الشي وصل لعمودية نيويورك، والسيد مو كانت من أشهر المخرجات ديك الساعة، وجيفري عندو علاقة بكل المنتجين السينمائيين، يعني صورة عادية.

المغاربة لي تدكرو الأسماء ديالهوم، كل الإيمايلات عادية وما فيها حتى شبهة.

رجل أعمال كبير في العالم، عندو علاقات معروفة مع مسؤولين كبار في الإدارة الأمريكية، كيسيفط إيمايل لمسؤول مغربي غما لدعوة لحضور شي ندوة سياسية، او للاستفسار على شي معلومة، او لطلب القيام بأعمال اللوبيينغ، وهو كان معروف ديك الساع بأنه مجهد فهاد الضومين، او لطلب مساعدة تقنية تخص الاستثمار.

وبالتالي مكاين حتى شبهات.

لافيغ الواحدة لي كلها شبهات وتذكر فيها المغرب، المتورط فيها هو وزير الثقافة الفرنسي السابق جاك لانغ، وما كاين حتى اسم شي مسؤول مغربي متورط فيه.

ممكن أنه جيفري حاول يستدرج شي مسؤول مغربي، عادي انه يفكر فيها، ولكن ما كاين حتى شي حاجة تثبت في كل ما تسرب ان شي مسؤول مغربي سقط في الفخ ديالو.

المضحك هو الجزائريين فرحانين بلي حتى وثيقة متدكر فيها اسم شي جزائري، في حين كاين أسماء من قطر والإمارات والسعودية والكويت ومصر والمغرب.

بلا منعاودو انه هاد الأسماء كلها تذكرات فسياقات عادية، فالسؤال هو: لاش غيتدكر اسم الجزائر؟

جيفري ايبستيين كان كيلعب في التيران ديال الشركات العالمية الكبيرة، والدول لي عندها تأثير دولي او إقليمي، هادشي لي كان مشغول بيه.

لاش غيفكر فالجزائر؟

عدم ذكر الجزائر ماشي دليل على انهم انقياءـ بل انها دولة معندها حتى تأثر في المحيط ديالها.