قال الحسين يوعابد، المسؤول على التواصل فالمديرية العامة للأرصاد الجوية، بأن المغرب داخل على أسبوع ماشي ساهل من ناحية الطقس، غادي يتميّز بالشتا فبزاف دالمناطق، رياح قوية، وحتى الثلج فمرتفعات الأطلس.

وشرح يوعابد، فتصريح لـ”كود”، بأن اليوم الاثنين غادي تكون تساقطات مطرية مهمة خصوصًا فالريف وطنجة واللوكوس والغرب والأطلس المتوسط، ومعاها زخات رعدية من حين لآخر. حتى الأطلس الكبير وسايس وأولماس غادي يعرفو الشتا، بينما أمطار متفرقة غادي تنزل فالسهول الأطلسية شمال كازا وشرق الواجهة المتوسطية.

وزاد بأن الثلج متوقع فوق قمم الأطلس الكبير، ومعاه رياح قوية نسبياً فالشمال الغربي والريف والمنطقة الشرقية، وحتى احتمال تطاير الغبار فجنوب البلاد.

وبالنسبة لنهار الثلاثاء، أكد يوعابد بأن الجو غادي يبقى ما مستقرش، مع أمطار معتدلة فالريف وطنجة واللوكوس، ورذاذ خفيف فالسهول الأطلسية وسايس، ومع تشكّل الضباب فسوس وشمال الأقاليم الجنوبية.

مصدر الصورة

والمهم حتى البرد غادي يكون قاصح فالأطلس، ودرجات الحرارة ممكن توصل حتى لناقص 5 درجات فبعض البلايص.

أما نهار الأربعاء، فكاين تحسّن نسبي، ولكن الغيوم غادي تبقى حاضرة مع قطرات مطر متفرقة فالشمال الغربي والريف، ومع ارتفاع طفيف فدرجات الحرارة خلال النهار.

وعلى حساب تصريح يوعابد، فمن الخميس حتى السبت الاضطرابات الجوية غادي ترجع للنصف الشمالي، ومعاها احتمال رجوع الثلج لمرتفعات الأطلس والهضاب العليا الشرقية، قبل ما يستقر الجو تدريجياً ابتداءً من نهار الأحد.

عموما، حسب يوعابد لـ”كود”، فإن الجو غادي يبقى يستقر ابتداء من انهار الأربعاء الجاي، مشيرا إلى أنه الشتا مزال كاينة اليوم بعدد من المناطق الشمال، وتقريبا غادي تكون من طنجة حتى للصويرة وبعض الأمكان غادي تكون فيها قوية وفق للنشرة الإذارية التالية اللي مزال قائمة.

كما وضح باللي ابتداء من نهار غدا الثلاثاء غادي تنقص الحدة ديال الشتا فالشمال وغادي يبقى الانفراجات في الجنوب ووسط البلاد بشكل تدريجي، مع طقس مستقر ابتداء من يوم الأربعاء لي غادي تكون فيه صباحا فقط بعض الأمطار الخفيفة، وغادي يبدا الاستقرار من هاد انهار ديال الأربعاء.