رضا بهلوي ولد آخر شاه ديال إيران، خرج كيطالب باش طيح الجمهورية الإسلامية ،انسجاما مع الغضب ديال الشارع الإيراني، حيث هاد السيد اللي عندو دابا 68 عام، شخصية عليها الصداع مابين المؤيدين ليه ولي كيرفضوه .

مني رجعات الاحتجاجات اللي هزّات إيران فسيمانات اللي فاتو، خرج رضا بهلوي للواجهة وفكرّ الإيرانيين بالإرث السياسي ديال عائلتو مورا 47 عام باش طاح نظام باه، وصرّح وهو فرحان بلي دعا الناس يخرجو للشارع ، واعتبر بلي اللي وقع هو استجابة مباشرة للنداءات ديالو، ومن بعد دعا الرئيس الأميركي دونالد ترامب يتدخل فالأزمة مني نشر رسالة فـمنصة “إكس” دعا فيها بهلوي الإيرانيين “يسيطروا على الفضاء العام” وما يبقاوش غير كيتظاهرو ويمشيو، ولكن يبقاو فمراكز المدن ويفرضو حضور دايم تما.

هاد الخطاب ماشي جديد عليه، حيث سبق ليه فـ2023 حاول يمشي مع الموجة مني مات مهسا أميني، و شارك فتأسيس “تحالف الديمقراطية والحرية فإيران” مع شخصيات معارضة أخرى، فداك الوقت التحالف لي تطرح تسمّى بـ“ميثاق مهسا”، على أساس خارطة طريق للانتقال لنظام ديمقراطي علماني ،ولكن الخلافات الإيديولوجية والشخصية خلات المبادرة تفترك .

رضا بهلوي لي كيعيش فواشنطن منذ 1978 ،عندو رمزيتو الملكية بطريقتيو فاللباس و السبع صغير لي كيعلق والطريقة ديالو فالتواصل، وحتى لكنتو المريكانية الفارسية اللي كيهضر بيها ، هاد الشي كيخلي بعض الناس يشوفوه امتداد تاريخي للعائلة الملكية بالإضافة انه كيتعتابر قريب للمعارضة الإيرانية فالغربة ، وكاين تاني اللي كيشوفو بعيد على الواقع اليومي للناس وسط إيران عاد علاقتو مع اسرائيل ومريكان لي ممكن تخليه صعيب يلقا إجماع عند الايرانيين.

التكوين ديال بهلوي كبيلوط فالقوات الجوية الأميركية كتعطيه تجربة عسكرية وتنظيمية، و كتخليه عندو تجربة في المجالات الرسمية والعسكرية ، رضا بهلوي كيبقى شخصية عليها الاختلاف مابين لي ل كيبان ليه انه الوحيد لي ممكن يجمع الايرانيين وبين لي كيقول انه باغي غا يركب على الموجة ويرجع ماضي جدودو.