كود الرباط //

علمت “گود” من مصادر موثوقة باللي مشاورات تشكيل الحكومة عرفات نهار الأربعاء اللي فات انسجام وتوافق كبير بين الوفد اللي ترأساتو فاطمة الزهراء المنصوري، رئيسة الحكومة، ومعها فوزي لقجع وعبد اللطيف وهبي وأحمد أخشيشن، ووفد المكتب السياسي لحزب التقدم والاشتراكية، اللي كان كيرأسو الأمين العام نبيل بنعبد الله ورشيد حموني رئيس الفريق البرلماني.

هاد اللقاء تميز بحضور فاطمة الزهراء برصات، كأول امرأة سياسية من حزب التقدم والاشتراكية كتحضر لهاد الجولات ديال المشاورات بين الأحزاب، خصوصا وان جميع الاحزاب للي حضرات المشاورات غيبات المرا وكاين لي فضل يجيب باه گاع بحال عرشان.

وحسب المعطيات المسرّبة اللي حصلات عليها “كود”، النقاش ركز بزاف على البرامج المستقبلية؛ حيث رحبات المنصوري بالبرنامج اللي قدمو حزب “الكتاب”.

وفد حزب الأصالة والمعاصرة (البام) صرّح بوضوح لوفد التقدم والاشتراكية باللي كاين توافق كبير بين الطرفين، وقالوا ليهم: “70% ملي جاء ف البرنامج الانتخابي ديالكم متفقين معاه وهوا أصلاً كاين ف البرنامج ديالنا”.

أهم النقاط اللي تركز عليها الاجتماع وشكلات خطوط عريضة للحكومة الجاي، هو أنه كاينا رغبة بين الطرفين باش تكون حكومة بوزراء سياسيين من خلال الاتفاق على إبعاد التكنوقراط والاعتماد على أطر وسياسيين يمثلون الأحزاب.

ومن الامور الايجابية، تقول مصادر گود، إعطاء الأولوية للحقوق والديمقراطية، من خلال إعطاء البعد السياسي والديمقراطي والحقوقي أهمية قصوى ف العمل الحكومي، مع التأكيد بلي الملف الحقوقي غيكون حاضر بقوة ف التشكيلة الحكومية.

هاد التناغم الكبير والتطابق ف الرؤى بين قادة البام وقاذة الكتاب كيأكد، حسب نفس المصادر، أن حزب التقدم والاشتراكية قريب بزاف يدخل للتحالف الحكومي المرتقب. وهادشي كيعني بلي حلم تحالف البام مع أحزاب الكتلة قريب يتحقق مع أول حكومة كيترأسها البام.

يشار بلي برلمان البام مشا ف توجه التحالف مع احزاب الكتلة ورفض الاحرار.