أميمة عطية – كود كازا ///

كالت خديجة الرباح، المنسقة الوطنية للجمعية الديمقراطية لنساء المغرب، إن إعداد “بارومتر التمثيلية السياسية للنساء” على ضوء انتخابات 23 شتنبر 2026، واجه صعوبات كبيرة، خصوصا فالوصول للمعلومة والمعطيات المرتبطة بتمكين لعيالات والمشاركة ديالهم فالسياسة.

الرباح، في ندوة صحفية لي دارتها الجمعية لبارح الاثنين 28 شتنبر، كالت إن الحق فالحصول على المعلومة باقي كيشكل مصدر قلق، مشيرة إلى أن بعض الأحزاب رفضات تقاسم المعطيات المتعلقة بالتمكين السياسي لعيالات، وهو ما مكيصعب توفير معلومات دقيقة وموثوقة.

وحسب نتائج البارومتر، التقدم والاشتراكية وتحالف اليسار هما الحزبين اللي سجلو “مستوى جيد” فمؤشر إدماج التمكين السياسي ديال لعيالات فالسياسات الحزبية، بينما جات أحزاب أخرى فمستويات متوسطة أو ضعيفة.

وفمؤشر آخر كيقيس تراكم تجربة الأحزاب فالترشيحات ديال لعيالات، جاو فالمستوى الجيد التقدم والاشتراكية، تحالف اليسار، والأصالة والمعاصرة، بينما سجلت 58.3 فالمائة من الأحزاب مستوى ضعيفا فهاد المؤشر.

أما فمؤشر المساواة والمناصفة فمواقف الأحزاب من الإصلاح الانتخابي، فاقتصر المستوى الجيد ، على التقدم والاشتراكية وتحالف اليسار، بينما سجلات الأصالة والمعاصرة والاستقلال والاتحاد الاشتراكي للقوات الشعبية مستوى متوسط.

البارومتر كشف حسب نفس لمصدر، على تفاوت كبير فمدى حضور المساواة والمناصفة داخل الخطاب والممارسة الحزبية، إضافة لضعف الحماية ديال لعيالات من العنف السياسي.

وبحسب المعطيات المقدمة، 75 فالمائة من الأحزاب المشمولة بالتقييم سجلت مستوى ضعيفا فمؤشر الوقاية من العنف السياسي وضمان بيئة حزبية آمنة.

والأكثر من هاد الشي، أن المؤشر الخاص بآليات الوقاية الداخلية من العنف السياسي سجل مستوى ضعيفا عند الأحزاب الـ12 كاملة، حسب نتائج البارومتر.

الجمعية اعتمدات فهاد البارومتر على 15 مؤشرا موزعين على خمسة أبعاد، كتشمل الالتزام السياسي والحزبي بتمكين لعيالات، وحكامة الترشيحات والنفاذ للمسؤولية، والدعم والتمكين خلال الحملة، والتواصل والظهور السياسي، ثم الوقاية من العنف السياسي والاستجابة ليه.

والهدف من هاد التقييم، حسب الجمعية، هو ما يبقاش حضور لعيالات فالانتخابات غير مرتبط بعدد الترشيحات، ولكن يتقاس حتى واش عندهم فرص فعلية للمنافسة والوصول للمسؤولية وصنع القرار داخل الأحزاب والمؤسسات المنتخبة.