كيفاش البامي الليموري بغى يبين راسو حاكم السواني وفرش كلشي. قيادي سابق لـ"كود": ما عمر التراكتور وصل لألف مقعد تماك ومع هاد العمدة ف"القدس" و"السبتي" جاب كثر من ألفين راه فضيحة .

مصدر الصورة

كود طنجة ////

ول البارح لخميس 24 شتنبر اي نهار بعد الانتخابات خوى البامي منير الليموري عمدة طنجة ومدير حملة وكيل لائحة طنجة فالانتخابات المغرب من باب سبتة بعد الظهر. كلشي فشي شكل. مسؤول منتخب يدخل من باب سبتة ويهرب نهار بعد النتائج. هاد الليموري البارح الجمعة عرفنا انو مبحوث عليه. شكون قال ليه اللي الدقة جاياه. التحقيقات تورينا.

لكن اجيبو تشوفو لفضيحة اللي هو متهم فيها. الادانة مازال. الادانة كيديرها القضاء.

نهار لاربعا 23 شتنبر 2026 بمدرستي القدس وعباس السبتي بكاسا باراطا بمقاطعة السواني بطنجة لقاو مراقبين خاصة من حزب “اللبيراليون الجدد” صيكان وراق فيهم التصويت وكلشي ومحطوطين فالصندوق. ناضت القيامة. القضاء دار خدمتو. الداخلية دارت خدمتها فانتظار تحقيق نشوفو واش كاينين شي رجالات سلطة مورطين فهاد الفيلم.

اللي كاين هو اصوات كثيرة فيها علامة التراكتور اما تحطات فالصندوق او غادية تحط.

دابا القضية تطورات بعد هروب منير الليموري مدير حملة عبد اللطيف الغلبزوري مرشح البام فطنجة واعتقال 5 اشخاص فهاد القضية. لكن اجيو نشوفو النتائج فهاد السواني بطنجة. المقاطعة اللي كينتمي ليها هاداد الليموري. الارقام كلها ريبة وشك. فجميع مكاتب التصويت وكيف كتشوفو فهاد الوثيقة اللي كتنشرها “كود” مع الموضوع، البام جاب ما بين 41 صوت و84 صوت. قيادي سابق فالبام قال ل”كود” باللي من نهار الحزب بدا يشارك فالانتخابات وهو كيخدم فالحملات الا ديال هاد السنة، وباللي فالسواني ديما البام كيجيب مقاعد محدودة، حتى جا الليموري وشفنا مضاعفة هاد الارقام بطريقة غريبة بزاف.

دابا حتى فانتخابات 23 شتنبر اللي فات راه البام جاب فهادوك جوج مدرسات اللي ناض فيهم الصداع: القدس وعباس السبتي، 2044 صوت ومكاتب اخرى فالسواني العدد ما فاتش 84 صوت. وا مورقة بزاف بزاف.

دابا القضية بيد القضاء. عندو كاع المحاضر. عندو 5 المتهمين فانتظار اعتقال العمدة الليموري. عمدة البام