علاش مكاين حتى شي حزب كيهدر على الغاء تجريم الدعارة وتقنينها، وتقنين استهلاك الحشيش والغاء تجريم العلاقات خارج اطار الزواج، تخفيض الضريبة على الطاسة، كلهم باغين غير يزيدونا الفلوس آش غادي نديرو بيهم ومعندنا فين نخسروهم، ناكلو الخبز وأتاي ونبقاو غادين جايين للجامع، السعودية أيام الهيئة راه كانت شبعانة فلوس وشبعانة دعم للشعب والضريبة شبه مكايناش، وكانوا شبابها كيهربوا منها حيت ماكان عندهم مايديرو بهاد الفلوس، الترفيه راه من اهم الحوافز العيش والحياة والسعي والكسب، بلا ترفيه لاش غادي يخدم بنادم ويبدل مجهود كثر واش غير على الخبز كأننا باقين في القاع ديال هرم ماسلو.

النقاش السياسي عندنا خبزي بحال الى يالله خرجنا من الكهف، الهدرة غير على الاوراش الكبرى والدعم وصندوق المقاصة وغلاء المعيشة الضنكة، والوعد بلي الشعب غادي يوصلوا حقو من الثروة عبر برامج دعم، أما طريقة العيش والأفكار والحريات وكيفاش بغينا نشوفوا هاد البلاد مستقبلا الحياة فيها كي دايرة،كتلقى أن النقاش في الجزر اليونانية وفي روما قبل ألفين سنة كان أعمق وأرقى وأهم من شنو كيتناقش دابا في المغرب، كأن الزمن توقف عند البداية ديالو فيزالرواية الرسمية أي عند دخول مولاي دريس هاربا من المسلمين في الشرق الأوسط.

طبعا حنا كدولة جداد في هادشي ديال السياسة نسبيا، لأنه حتى شي مغربي مكان جدو في الحزب الليبيرالي وجداه في الحزب الشيوعي، ولكن خمسين عام ديال الانتخابات والأحزاب والسياسة واخا تكون كتدار بطريقة بدائية غادي يكون واحد النضج وهاد المدة كافية لتحقيق تراكم، بحال لي وقع في آسيا وعدة دول أخرى ماشي ضروري نكونوا عشنا نفس احداث الثورة الفرنسية باش يطلع الوعي السياسي للمغاربة، ولكن للأسف من بعد هاد السنوات كلها هاهو نفس المشهد كيتعاود وببؤس أكثر لأنه موثق صوت وصورة، مرشحين جامعين الشبانيين والعيالات وكيدورو في الدروبة بالغنى والشطيح، ولحد الآن مكيناش الجرأة في النقاش او التعاطي مع مشاكل الشباب الحقيقية لي على ودها دارو هروب جماعي لسبتة.