واش لفتيت كيدعم طرف سياسي فهاد الانتخابات؟.. بنكيران أشاد بالداخلية.. وقيادات فالبام والأحرار لـ"گود": كاين الحياد وبرافو للداخلية على خدمتها .

مصدر الصورة

احمد الطيب – كود الرباط//

مع حرارة الحملة الانتخابية والسباق المشتعل بين الأحزاب والتنافس القوي على شكون ياخد رئاسة حكومة المونديال، كاين تساؤل كبير حول دور وزارة الداخلية ف ضمان شفافية ونزاهة العملية الانتخابية.

وفهاد السياق أكدت قيادات حزبية من المعارضة والأغلبية بلي وزارة الداخلية واقفة على مسافة واحدة من الجميع، وما كاين حتى شي مؤشر ولا دعم لأي طرف على حساب الآخر.

عبد الإله بنكيران، الأمين العام لحزب العدالة والتنمية، أكد فكلمة له وسط الحملة الانتخابية قبل ايام، بلي “وزارة الداخلية أخذت نفس المسافة تقريبا من جميع الأحزاب السياسية”، وزاد وجه ليها الشكر قدام القواعد ديالو وقال: “الله يجازيهم بخير”.

وتأكيدا لهاد الكلام ديال بنكيران، تواصلت “كود” مع قيادي بارز فحزب التجمع الوطني للأحرار، لي قال بلي الداخلية كتقوم لحدود الساعة بعمل كبير وممتاز، وواقفة فمسافة محيدة على كاع الأحزاب المنافسة.
نفس الطرح أيدو قيادي فحزب الأصالة والمعاصرة (البام)، لي قال لـ”كود” بلي ما كاين حتى شي دليل أو مؤشر كيدل على وجود دعم من الداخلية لشي حزب ولا منافس، معبراً على الإشادة ديالو بالدور الكبير لي كتلعبو أجهزة وزارة الداخلية فالميدان.
وكانت وزارة الداخلية سبق ليها واعلنت تفعيل لجنة مركزية لمتابعة كافة المحطات المرتبطة بانتخابات 23 شتنبر 2026، تضم الوزير عبد الوافي لفتيت وقادة الأحزاب السياسية على المستوى المركزي.
وأكدّ بلاغٌ سابق لوزارة الداخلية، أن تفعيل هذه اللجنة يأتي تبعاً لأمر من الملك محمد االسادس، موضحةً أن اللجنة تتألف من وزير الداخلية ورئيس النيابة العامة، “وسيعهد إليها بصفة أساسية بالسهر على ضمان سلامة وصدق العملية الانتخابية في مختلف مراحلها”.