فوزي لقجع حرك الحملة الانتخابية لهاد العام. ماشي غير حركها بل نقد التراكتور من الغرق. حزب الاصالة والمعاصرة تشهر فايامو الاخيرة غير بالفضايح. فضيحة بنت الباشا فاطمة الزهراء المنصوري فارض تاسلطانت. فضايح مهدي بنسعيد اللي باش وصل للوزراة وغير 3 شركات اللي خذات كاع صفقات الاتصال والثقافة والشباب بلا ما نهدرو على فضيحة ديك طونوبيلة لعواشر اللي تقدمات لسيدنا بلا حيا بلا حشما وفضايح عدد من مستشاريه. قبل هاد الشي كان زلزال اسكوبار الصحرا المالي اللي جبد معاه جوج من كبار قياديي البام: سعيد الناصري ورئيس الجهة الشرقية عبد النبي بعيوي. بجوجهم دانو ابتدائيا فقضية مرتبطة بالمخدرات.

حزب عندو 3 ريوس وحتى فهاد القيادة الثلاثية طاح راس =صلاح ابو الغالي= على قضية تجارية كانت ضد الامين الجهوي للبام عبد الرحيم بن الضو. هاد الاخير غادي يدخل فقضية وتغلق عليه الحدود ويتسحب ليه الباسبور وبقدرة قادر رجع ليه كلشي ولكن مازال متابع فقضية شحنة فاسدة. كان مشى من الحزب ورجع. العبث صافي.

حزب فهاد الوضعية، حسب قيادي من البام ل”كود” “كان يجي الرابع فالانتخابات التشريعية ديال 23 شتنبر”. كان. قبل ما يجيب فوزي لقجع. جوكير الحكومة اللي بدل كلشي. فين ما تحرك كيجيب المئات يشوفوه ويسمعوه. كيسالي كلامو كيبداو يخرجو. شخص بوحدو رجع الروح لحزب تقتل مع بنت الباشا.

دابا كاع الباميين عارفين ان هاد العودة سبابها فوزي وبنت الباشا مع بنسعيد ومستشاريه كيهمهم لهموز. كيهمهم المناصب. هاد المناصب مشروطة باش تتعين بنت الباشا رئيسة حكومة. القرار طبعا بيد رئيس الدولة وخاص هاد الحزب يجي هو اللول فهاد الانتخابات وهاد الشي ماشي محسوم. لكن كيبين على عقلية هادو.

من المفروض المجلس الوطني للبام يدعو لمؤتمر استثنائي ويجري على وحدين ما دارو والو اللي هما المنصوري وبنسعيد. ما يمكنش يجري فوزي ويتحرك غير البارح مثلا من مراكش ويحضر ويدخل لجمهور جا على قبالو ويرجع فالليل لبوزنيقة للقاء اخر. هاد المجهود اللي مستافد منو هي بنت الباشا واللي معاها.

ايلى قدر البام يكون اللول راه ظلم كبير تكون وحدة اسمها مرتابط بفضايح تسلطانت ووحدة ما قدرات تقدم خلال ولايتها الحكومية الا قانون واحد بدعم من الداخلية.

كيفاش حزب كان قادر غير على الرتبة الرابعة فالانتخابات ولى كينافس على الاولى والسبب يعود لشخص واحد للي هو فوزي لقجع وهادو صحاب التراكتور كيستافدو من شعبيتو بلا ما يديرو شي تحرك يرجعوه امين عام. طبعا هما اللي رابحين فهاد الفيلم