مروان شباعتو مشى من لحمامة وركب على التراكتور. كيفاش هاد المدلل كيروج باللي غادي يكون وزير. قيادي فالبام ل"كود": من حقو يحلم ولكن ما عمر شي حد واعدو لشي حاجة وبرلماني: مستواه ضعيف .

كود الرباط ///

مروان اشباعتو عضو المكتب السياسي السابق لحزب التجمع الوطني للاحرار اللي خداها ورث من بوه سعيد اشباعتو حالة نفسية. خرج بوه الاتحادي السابق اللي كان وزير المياه والغابات فحكومة عبد الرحمان اليوسفي كيتنكر لمبادئ هاد الحزب. حتى هاد الولد اللي عندو مشاكل مع نيفو ومحتاج لطبيب النيف والحنجرة او نورولوگ، خرج كيهاجم المعلمين. هاد الاتحادي للي تحول لاقطاعي باش دخل للاحرار ما رضاش ان معلم فحزب الحمامة يكون وزير او كاتب دولة وولدو اللا.

لا هو لا بوه بينو ان انتماءهم الحزبي سواء مع الاجرار او مع البام كيحركو لوزيعة ماشي النضال. كان طامع بعد الوزارة فرئاسة لجنة المالية. ما خداهاش وما غاديش ياخدها حسب قيادي من البام ل”كود”. هاد الاخير قال باللي التحاقو كان بلا شروط وما تعطاتو حتى شي وعود. برلماني فمجلس النواب من فريق من المعارضة سبق وخدم معاه قال ل”كود” باللي مستواه ضعيف ما يأهلو لا يكون رئيس فريق ولا رئيس لجنة وطبعا يبعدو على الاستوزار.

مروان شباعتو كيقدم راسو باللي قرا فباريس وبالضبط المدرسة العليا للتجارة باريس. احد خريجي هاد المدرسة اكد ل”كود” باللي هاد المدرسة تقدر تعطيك ديبلوم ايلى خلصتي شي 7 الاف اورو. مصدر ل”كود” اضاف “نتحداه ينشر فصفحتو الديبلوم باللي قرا تماك”. مستواه ماشي ديال واحد دوز الاقسام التحضيرية لهاد المدرسة العليا. يقدر يكون من هاديك العينة اللي كتدخل وتخلص.
مصدر الصورة

البام كي الاحرار ارتكبو خطأ. كيقولو باللي كيدافعو على الشعب وولاد الشعب وجايبين واحد بحالو بحال بوه عندهم نظرة دونية لمهنة التعليم. التربية الاتحادية تبخرات مع الاطماع وخلقات امثال مروان اللي كيقول راه قرا فالاخوين. حتى هادي هو اللي قالها وفرحان بيها

https://www.instagram.com/reels/DRzzPfBjOK_/