ايلا بغيتي تعرف واش الانتخابات قربات فالمغرب، بلا ما تشوف البلاغات الرسمية، غير تبان ليك الدكاكة خدامة بالليل والنهار، وريحة الزفت عاطية، عرف بلي “القيامة الانتخابية” ناضت.

هاد الظاهرة المغربية ديال “الزفت الانتخابي” كتبان ديما مني كيقربو الانتخابات، الحفاري لي كنتي حافظهم فين كاينين كيتسدو، وشانطي لي مكرفص تيولي زربية وحتى من الصباط كيتسيرا بالزفت.

السياسين خدامين بمنطق المغاربة القدام مني كانو كيخليو اللحم هو لخر فالطاجين عاد يفرقوه، باش الكرش مني تشبع تقول للراس نوض غني “لا لحم لابرقوق فرتلان فالصندوق‘‘.

كمواطنين مايمكنش نحاسبو مجلس جماعي او جهوي او أداء حكومي على العام الأخير وإنما على طول الولاية، حيث البنية التحتية خاصها تكون دايمة، ماشي حتى يتساس الحديد عاد نتفكروا بلي الطريق خاصها تقاد.

إصلاح الطرقان والبنية التحتية خاصو يكون واجب يومي، ماشي غير على قبل التصويت، كيف ما خاص دار “شركات جهوية لصيانة الطرق” خدامة على طول العام كتصلح من أكبر طريق حتى لأصغر حفرة لي تقدر تصورها وتلوحها فلابليكاسيو ديال الشركة وتجي تصلحها ف48 ساعة مدام كنخلصو الضرائب.

المجلس الأعلى للحسابات فـالتقرير الأخير ديالو قال بلي ملايين الدراهم كتمشي فـ”دراسات تقنية” وفاش كتوصل وقت المعقول، كيبدا الروطار تا كتقرب الانتخابات، كيف ما هضر التقرير حتى على تتبع جودة الأشغال”، وجر شلا مسؤولين ومنتخبين للمساءلة القضائية، يعني الفلوس كتخرج من جيب المواطن باش تمشي للدراسات والصفقات، والنتيجة كتبان غي فالسيمانة اللخرة ديال الانتخابات هادشي إلا كانت الطريق مخدومة على حقها.

دابا السؤال هو واش خاصنا نديرو الانتخابات كل 3 سنين فبلاصة خمسة ولا ستة، باش المغرب كامل يتزفت من طنجة للكويرة”؟