فسابقة. تسجيل صوتي منسوب للتجمعي طالبي العلمي فالمكتب السياسي : جبد لقجع وهاجم ابتزاز المرشحين وحذر من الترحال السياسي .

مصدر الصورة

احمد الطيب – كود الرباط//

تسجيل صوتي تسرب من المكتب السياسي لحزب التجمع الوطني للأحرار، فسابقة ف تاريخ الاحزاب المغربية، تسريب ناضو شي وحدين باش يستغلوه انتخابيا.

خلاصة هاد التسريب، هو أن رشيد الطالبي العلمي، تشكا من ممارسات كيديرها البام ضد حزبو التجمع، من خلال سرقة مرشحين ديالهم واللي سبق تم تزكيتهم رسميا باسم الحمامة، وهو تقريبا نفس المواقف لي جات ف بيان المكتب السياسي لي تصدر اليوم.

وانتقد الطالبي ممارسات وضعوطات على الاحرار، مشيرا بلي رفض هاد الضغوطات ف سنة 1992 هو للي خلا الاحرار يبقا، فاش قالو لا للتدخل ف شؤون الحزب، ووضح :”واش يسمح لينا الضمير ديالنا نقبلو بممارسات موجودة الفيفا ف العمل الحزب، للي عندو قواعد ديالو فالممارسة الديمقراطية بشكل تدريجي”، مذكرا بأن المنطلق الأول والأخير هوما خطابات الملك.

وقال الطالبي :”ف 2007 عملنا احصاء حول الترحال السياسي داخل مجلس النواب، ولقينا 166 ترحال واثناء استقبال الملك لرئيس المجلس واعضاء مكتب المجلس طرح سؤال كيفاش هاد الترحال السياسي، كاينا تجارب دولية تمنع الترحال السياسي …”.

الطالبي قال بلي خاص نقولو المواقف ديالنا، واخا نجيو الثانيين، موضحا :”مزيانين نجيو الثانيين ونوضعو الشروط ووزارة المالية والله لا شافها” فاشارة لفوزي لقجع عضو المكتب السياسي للبام، واضاف بلي “والله لا كانت ليه “.

وشدد الطالبي بلي السياسة كتكون بالمواقف، وبلي وزارة المالية خصها تكون ديال لالة نادية فتاح علوي.

وتابع الطالبي بلي “كاينين ممارسات يجب ان نضع لها الحد” وهدر على الترهيب ديال شي مرشحين والرغيب فشي وحدين خراين

الطالبي هضر بطريقة عادية، وباسلوبو المعروف. ولكن تسريب تسجيل من المكتب السياسي، ضرب لحزبو. للي سرب باغي يخربق اللعب.

وحسب التسجيل، الطالبي ما سب حتى شي واحد. دار قراءة للي واقع وتكلم على ممارسات سياسية معينة، وانتقد ترحال وجوه ف الاحرار لأحزاب اخرى وذكر بتاريخ حزبه ومواقفه وانتقد تهرب من المسؤولية من البعض داخليا، وكذلك بعض الفوضى فالعمل الحزبي.