كشف تقرير حقوقي دارتو المنظمة المغربية لحقوق الإنسان، بلي محاولات العبور الجماعي لسبتة ومليلية المحتلتين عرفات انتهاكات خطيرة لحقوق الإنسان، كتمس بالحق فالحياة والسلامة الجسدية، ودعا لفتح تحقيقات وتفعيل المحاسبة.

التقرير اللي تعرضت المضامين ديالو فالعاصمة الرباط، وضح بلي العبور لسبتة خلف ضحايا، السلطات الإسبانية هضرات على 100 حالة وفاة، بينما السلطات المغربية سجلات 14 وفاة.

الأحداث عرفات كذلك أعمال عنف تخلفو عليها جرحى ومصابين، وتحرقات فيها طوموبيلات ديال الدولة والخوصاصيين، وتشدو حوالي 100 واحد من بينهم قاصرين، وتحكمو سائقين ديال الطاكسيات بـ 6 شهور فـتطوان. التقرير وثق استخدام مفرط للقوة واعتبر بلي هادشي كيطلب فتح تحقيقات عاجلة.

فنفس السياق، فمعبر بني انصار مع مليلية، التقرير سجل أحداث عنف بعد محاولات هجرة جماعية، أثرات على مرافق عمومية وتسببات فإصابات، وتتابعو فيها 50 واحد (43 منهم فالمعتقل)، وتحكمو أكثر من النص فيهم.

شاهد على يوتيوب

ونبهات المنظمة بلي هاد المحاكمات دازت بلا حضور محامين بسبب الإضراب ديالهم، هادشي اللي كيطرح علامة استفهام كبيرة على شروط المحاكمة العادلة وحق الدفاع لهاد المتهمين اللي أغلبهم كيجهلو القانون.

أما بخصوص الدعوات ديال العبور الجماعي فـ 15 غشت، التقرير أشار باللي تنقل بزاف ديال المسافرين اتعطل غير حيت تشك بلي باغيين يمشيو لسبتة. وهاد المحاولات تسببات فتوقيف 294 شخص (248 منهم من دول جنوب الصحراء و46 مغاربة)، وتسجل حتى تضييق على الخدمة ديال الصحافيين.

وبالنسبة للأسباب، التقرير حدد مجموعة من العوامل اللي شعلات هاد المحاولات، على رأسها السوشيال ميديا، والإشاعات اللي تروجات بلي اللي وصل للبحر غادي تسوى وضعيتو فإسبانيا، إضافة للأوضاع الاقتصادية والاجتماعية والرغبة فترقيع العيش، مع انسداد أفق الهجرة النظامية.

داخل سبتة، التقرير وصف الوضع الإنساني بالـ”مأساوي”، خصوصاً بالنسبة للأطفال والعيالات والفتيات اللي تعرضو لانتهاكات كبيرة.

وكاين نقص حاد فالما والمشربة، مع منعهم يدخلو للمحلات يشريو الماكلة، واعتتمادهم فقط على المساعدات القليلة ديال الساكنة والجمعيات، زيادة على وضع صحي مقلق، غياب المأوى، وانتشار العنصرية والكره. وفق التقرير

المنظمة جمعات شهادات تؤكد وقوع حالات عنف واعتداءات جنسية، تسجلات منها 5 حالات رسمية، بينما الشهادات اللي خذاتها المنظمة كتشير لإمكانية وصولها لـ 30 حالة اعتداء جنسي.

التقرير أكد بلي الحواجز والسياجات – بحال الحواجز العائمة اللي تدارت على طول 500 متر قبالة معبر تراخال – ما غاديش تحبس محاولات الهجرة. وأن الحل خاصو يرتكز على احترام الحق فالحياة والسلامة والكرامة، وضمان المحاكمة العادلة والعودة الطوعية، وتطبيق مبدأ “المصلحة الفضلى للطفل” كمرجع أساسي فكل القرارات.