مجلس عين الشق كيعلن على موعد جديد لدورة يونيو بعدما تأجلات بسبب قلة الحضور.. وملف “كازانييرشو” وميزانية 2026 فجدول الأعمال .

مصدر الصورة

أميمة عطية – كود كازا ///

كيستعد مجلس مقاطعة عين الشق لعقد الاجتماع الثالث للدورة العادية ديال شهر يونيو 2026، نهار الاثنين 29 يونيو بالمركز الثقافي عبد الله كنون بكازا ، بعدما تعذر انعقاد الجلسة السابقة اللي كانت مبرمجة يوم 23 يونيو بسبب عدم اكتمال النصاب القانوني.

بحسب معلومات لمتوفرا ، غادي تنطلق أشغال الدورة من 9 صباح، وغادي يتضمن جدول الأعمال عرض إخباري حول الأنشطة اللي قامت بها الرئاسة بين الدورتين، إضافة إلى عرض من طرف الشركة الجهوية متعددة الخدمات الدار البيضاء-سطات للتوزيع بخصوص عدد من الملفات المرتبطة باختصاصاتها.

ومن بين أبرز النقط اللي غادي تتناقش فهاد الدورة، مطلب باش اخرج مشروع لمنتزه الإيكولوجي بحديقة “كازانييرشو”.

وغادي يدرس المجلس تحويلات مالية تهم بعض فصول حساب النفقات من الاعتمادات المرصودة ضمن ميزانية سنة 2026.

وكتجي هاد الدورة فواحد الظرف اللي كتعرف فيه مقاطعة عين الشق حالة التوتر والخلافات داخل المجلس، بعدما خرجت الصراعات القائمة بين رئيس المقاطعة شفيق بنكيران ونائب ديالو أحمد مفتاح ووصلات حتى لأشغال الدورة الاستثنائية لمجلس جماعة الدار البيضاء لخميس لي فات.

وكانت الجلسة الأخيرة لمجلس الجماعة شهدات أجواء مشحونة، بعدما جبد أحمد مفتاح لبامي ملف المركز الثقافي والاجتماعي المكانسة، اللي ولى محور جدل كبير فلفترة لخرا، خصوصاً بعد الحديث عن واقعة اقتحام المركز وتغيير الأقفال ديالو، وهو الملف اللي كان من بين الأسباب اللي ساهمات فتعليق أشغال دورة مجلس مقاطعة عين الشق.

وكان عبر شفيق بنكيران عن حزب الأحرار على لغضب ديالو ورفض باش أتجلد هاد الملف داخل أشغال الدورة الاستثنائية لمجلس الجماعة، معتبراً أن الأمر خارج جدول الأعمال، وناضت روينة قبل ما تدخل لعمدة نبيلة رميلي باش تهدأ الأجواء واستكمال دورة .