واش الخدامة لي مابقاوش في المغرب أو العبيد لي نقارضوا، حيت على مايبدو أن هاد الجيل أكثر وعيا بإنسانيته وحقوقه ورافض ظروف العبودية في قطاع الشغل المغربي، هاد اليوماين كنتفرج ففيديو ديال صواب دار مشروع ديال الطون وكيهضر على كيفاش موفر كولشي للخدامة ومع ذلك كيمشيو ليه، آشناهو هاد كولشي؟ ينعسو في السدة ويخدمو ملي يفيقو حتى ينعسو والدوش قاليك يسخنو لما في مقراج ويدوشوا، واحد المثل كيقول الإنسان العاقل مكيخراش فين كياكل، وصواب بغاهم يخدمو وياكلو ويخراو في نفس البلاصة، غير فكرة أن بنادم كينعس ويستعمل الطواليط في مطعم راه كتعيف، ومن مسببات التسمم الغذائي وانتشار جرثومة المعدة.

العديد من الصناكات والحرف والقهاوي مخدمين ناس بلا وراق، وفي ظروف لا إنسانية وساعات العمل فايتة الحد القانوني، ويديكلاريوهم شهورة وشهورة لا، هاهوما حاليا عمال النظافة في المستشفى الجامعي بفاس خدامين في ظروف لا إنسانية وبلا حقوق، القطاع الخاص عموما بحال شي مزرعة ديال القطن في الجنوب الأمريكي قبل تحرير العبيد، هاد الدولة التي تفتخر بانها غادا تولي قطب صناعي واقتصادي كبير، اذن على الأقل تضمن حقوق العمال والمستخدمين ماشي تخلي القطاع سايب ومقابلة غير جباية الضرائب، راه خاص مايكون حتى مستخدم فشي قهوة او سناك او مطعم بلا وراق وبلا ساعات عمل محددة، وبلا حد أدنى للأجور محدد بالساعة، دول عادية ودايرة هادشي ومنظمة قطاعاتها الاقتصادية وغادية مزيان، ماليزيا كمثال راها في آخر الدنيا وكانت مستعمرة وغير شبه جزيرة عبارة على غابة مطيرة ومع ذلك بالقانون والحقوق وتنظيم القطاعات هاهي حسن من المغرب في أي مجال، وراه كيمشيو لأوروبا غير بالباسبور بلا فيزا.

شاب او شابة في المغرب بغاو يخدموا كعمال أو ليفريزون أو في الاستقبال عند المحاميين او الأطباء وباقي المكاتب، او في مجال المطاعم والسناكات والقهاوي، راه خاص يكون ساكن مع واليديه وكياكل ويشرب معاهم من العرام، عاد باش يقدر يعيش بالسميك او كثر منو شوية، حاليا كاين ندرة العمال في طنجة لأن أغلب اليد العاملة كتجيها من مدن ومناطق أخرى وخاصهم يكريو ويخلصوا لما والضو وباقي المصاريف، كيلقى الواحد راسو كيتستغل كثر من عمال المناجم في الكونگو، كل سيمانة فوقاش خاصو ينعس، وخدام كيشد صالير ويفرقوا في أول الشهر ويبقى ليه فلوس الخبز والقطاني وشي باكية دالكارو باش يقدر يمشي للخدمة لغد ليه، هادو مهن مستحيل تعيش بها بكرامة وإنسانية، المفروض عامل عادي خاصو يكون ساكن واكل شارب عندو هواية كيصرف عليها وكيسافر مرة في العام بموريتانيا يبدل الجو، بحال العامل الإسباني لي كيعيش مية مرة حسن من أستاذ مغربي.