لقجع فالبام باش يولي رئيس الحكومة… شكون طلق هاد الباراميتر ديال التحاقو البام؟ هو عندو رصيد من المصداقية والنجاح والحزب عامر اعطاب .

مصدر الصورة

فاطنة لويزا كود ////

هاد الايام كثر اللغا بزاف على واحد السيناريو سياسي جديد… فوزي لقجع غيلتحق بحزب الاصالة والمعاصرة… ومن بعد غادي يترشح لرئاسة الحكومة…
قبل ما ندخلو فالتفاصيل… خاصنا نطرحو السؤال الصحيح… شكون طلق هاد الهدرة؟؟ حيت فالمغرب ماشي تسريب كيكون صدفة… خصوصا ملي كيتعلق الامر بشخصية بحجم فوزي لقجع…

واش بالفعل كاين شي مشروع باش يكون لقجع رئيس حكومة؟؟ ولا كاين شي ناس خايفين من هاد الامكانية وباغيين يضربوها من الديبار؟؟ حيت لي عارف شوية تقاليد السياسة المغربية… عارف بلي ملي كيبدا اسم شي واحد كيدور بزاف على انه هو المرشح الجاهز او هو اختيار الدولة… فالغالب النتيجة كتكون عكسية…

علاش؟؟ حيت الدولة عمرها ما بغات تبان وكأنها هي اللي كتختار للناس شكون يحكمهم… واذا ولى الانطباع عند الرأي العام ان كلشي محسم قبل الانتخابات… شكون غادي يبقى مهتم بالانتخابات اصلا؟؟ ولهذا كاين احتمال كبير بلي الناس اللي طلقو هاد الرواية ماشي بالضرورة باغين لقجع يوصل… يمكن العكس تماما… يمكن باغين يحرقو الورقة ديالو قبل ما تولي ورقة حقيقية…

والاغرب ان هاد القصة ماشي جديدة… راه نفس الفيلم تعاود اكثر من مرة… ملي بدا الكلام على مستقبل التجمع الوطني للاحرار… وملي خرج عزيز اخنوش وقال بلي ما غاديش يترشح لولاية جديدة على رأس الحزب… خرجو ناس كيهدرو بثقة غريبة على انتقال لقجع للبام… وعلى مؤتمر استثنائي… وعلى ترتيبات كبيرة… وكأنهم حاضرين الاجتماعات السرية كاملة…

والمشكل ان بعض القيادات فالبام ساهمات بدورها فهاد النفخ… خرجات تصريحات فيها تلميحات اكثر مما فيها معطيات… واش عرضنا على لقجع يجي للحزب؟؟ ايه… واش وافق؟؟ غادي تعرفو من بعد… واش كاين شي جواب اكثر حموضة من هادا؟؟ السياسة ماشي برنامج ديال اكتشاف المواهب… وماشي مسلسل تركي خاصو التشويق فكل حلقة…

حيت ملي كتدير هاد النوع من التلميحات… كتفتح الباب للتأويلات كلها… وكتولي انت بنفسك كتساهم فترويج سيناريو ربما ما عندوش اساس اصلا…

الحقيقة ان فوزي لقجع اليوم ما محتاجش هاد النوع ديال الاشهار… الرجل دار اسم كبير براسو… سواء فوزارة المالية او فالجامعة الملكية لكرة القدم… وحتى اللي مختلفين معاه سياسيا كيعترفو بلي قدر يفرض حضور المغرب قاريا ودوليا فملفات كثيرة…

وكاين جانب اخر مهم… لقجع بالنسبة لعدد كبير من المغاربة ماشي غير مسؤول حكومي… بالنسبة ليهم قصة نجاح… ولد الهامش اللي وصل… واحد النموذج اللي كيخلي بزاف ديال الشباب يحسو بلي الاجتهاد مازال عندو معنى… وبلي المناصب الكبرى ماشي بالضرورة حكر على اولاد العائلات النافذة…

ولكن هاد الرصيد الشعبي بالضبط هو اللي خاصو يتحمى… وما يتحرقش فمعارك حزبية ضيقة… خصوصا وان البام اليوم ماشي عايش احسن ايامو… الحزب خارج من سلسلة طويلة ديال الازمات… ومن الصراعات الداخلية… ومن الفضائح السياسية اللي خلات صورتو تهتز اكثر من مرة…

ودابا كاين اللي باغي يقنعنا بلي الحل هو يجيب لقجع؟؟ واش هادشي غادي يحل المشاكل؟؟ ولا غير غادي ينقل المشاكل عند لقجع؟؟ حيت اي شخصية عندها رصيد من المصداقية… ملي كتدخل لحزب عندو هاد الحجم من الاعطاب… كتولي هي نفسها مطالبة تجاوب على هاد الاعطاب…

بل اكثر من ذلك… اذا كان فعلا كاين تفكير فالتحاق لقجع بالبام… فاول ورش خاصو يكون هو تنظيف البيت الداخلي… اما غير نجيبو اسم ثقيل ونعلقو عليه مشاكل الحزب كاملة… فهادشي ما عمره كان حلا…

من جهة اخرى… شخصيا ما عنديش حتى مشكل مع انخراط لقجع فالعمل الحزبي… بالعكس… المغرب محتاج كفاءات تدخل للسياسة من الباب الكبير… حيت ما بقاش معقول يبقا الفرق كبير بين التكنوقراط والسياسيين… فكل الديمقراطيات الحديثة الاحزاب كتحاول تستقطب الكفاءات… وكتصنع نخبها… وكتربط المسؤولية بالمحاسبة…

اما عندنا فبزاف ديال المرات كيلقاو الناس راسهم وزراء بلا ما يدوزو من تجربة سياسية حقيقية… ولهذا اذا بغى لقجع يمارس السياسة… من حقو… واذا بغى ينتمي لحزب… من حقو… واذا بغى حتى يترشح لرئاسة الحكومة… من حقو…

ولكن بشرط واحد… يدوز من الباب الكبير… باب السياسة… باب البرامج… باب التنافس الانتخابي… ماشي باب التسريبات والكواليس… لان المغرب محتاج انتخابات حقيقية… وما محتاجش صناعة اوهام سياسية جديدة…

وفي النهاية… ربما اقوى رد على هاد الجدل كامل جا من لقجع راسو… ملي قال بوضوح بلي ما منتميش لا للبام ولا لغيرو… وانو نهار غادي يقرر يدخل السياسة او ينتمي لحزب… هو اللي غادي يخرج ويقولها…

وهاد هي فعلا طريقة الناس اللي كتحترم راسها….