البام بدا كيرجع منتخبين ديالو من الأحرار.. واش السيمو غايترشح مع التراكتور؟ ها جوابو ل"گود" .

مصدر الصورة

كود الرباط//

الماكينة الانتخابية لحزب الاصالة والمعاصرة، دخلت ف السرعة القصوى ف الاستقطاب ديال المنتخبين الكبار والاعيان والكفاءات وصحاب الفلوس والنفوذ لي قادرين يجيبو مقاعد برلمانية للوصول لرئاسة حكومة 2026.

حرب استقطابات ف مدن كبرى وصغرى، وصلت لدرجة ان البام بدا كيقنع الناس ديالو القدام خصوصا لي كانو مع حركة لكل الديمقراطيين وأثناء تأسيس حزب الأصالة والمعاصرة سنة 2008.
من الاسماء للي تروجات بلي غاذي يتم استقطابهم، هو محمد السيمو، رئيس جماعة القصر الكبير، ولا افراد عائلتو. السيمو كان فالبام وممكن يرجع له.

وفي اتصال مع “گود”، أكد محمد السيمو أنه غادي يترشح للبرلمان، وانه لحد الساعة باقي مع حزب التجمع الوطني للأحرار، مضيفا :”معنديش مشكل مع البام.. والمنصوري وبنسعيد كيديرو معايا المزيان وكيستجبو الحاجيات د الساكنة، من غير الوزير السكوري مبغاش يدير لينا مفتشية الشغل ف القصر الكبير”.

السيمو، ما نفاش ولم يؤكد بلي بنتو زينب السيمو بلي ممكن ترشح مع البام، ولا ولدو الاستاذ الجامعي. يعني ممكن يفرق عائلتو بين البام والاحرار ويرضي هاد جوج الاحزاب السياسية الحاضرة بقوة ف المشهد الوطني.

يشار بلي السيمو عندو الحق ف الترشح، بعدما أسذت غرفة الجنايات الاستئنافية، بمحكمة جرائم الأموال بالرباط، القرار الجنائي الابتدائي القاضي ببراءة البرلماني محمد السيمو من تهم تبديد المال العام.
وكانت محكمة جرائم الأموال الابتدائية بالرباط قد أصدرت، منتصف يوليوز الماضي، حكمها ببراءة محمد السيمو، رئيس جماعة القصر الكبير، و البرلماني عن حزب التجمع الوطني للأحرار ومن معه من التهم المنسوبة إليهم.