من بعد التيزر لي حطو أخنوش نهار السبت فالباج الخاص بيه كانت انتظارات وتأويلات كثيرة على مضمون الفيديو.. بين لي هضر على برنامج انتخابي أو احتمال رجوع أخنوش بقوة للساحة السياسية.

البارح خرج الفيديو، بعدما خلق تشويق كبير.. وشفنا فيه فعلا حضور تواصلي سياسي قوي لرئيس الحكومة، ولكن من أجل الحصيلة وهادي طريقة ذكية ومبتكرة لي خلات كلشي يتفرج، ورجع النقاش حول الحصيلة الحكومية بطريقة عفوية وسط الرأي العام.

فيديو مدروس بتفاصيله، أخنوش بان ضابط أمورو وبأسلوب خطابي هادئ، كانو الميساجات، الأرقام، الإضاءة، المشية، اللبسة، كلشي مدروس..

طريقة تواصل مبتكرة قطعات مع داكشي لي مولفين كنشوفوه فالساحة السياسية: غوات وسعار ورفع أصوات… وأفكار شعبوية ووعود غير منطقية، قطع مع خطاب تقليدي باقي طاغي عند بعض الأحزاب، أمثال الاستقلال والبي جي دي .

أخنوش ختار لغة الهدوء والأرقام و3D على طريقة Tedex لي متكلم أكثر مع الشباب لي عندو عزوف من السياسية بسبب سياسيين ماعرفوش يتواصلو معاه، وبسباب وعود تقدمت وتبخرت من طرف أحزاب همها الوحيد هو توظيف المقربين والأبناء والزوجات ف مناصب عليا.

فوقت لي بنكيران كيقول فخطاباته للشباب: خصكم ضحيو وتمشيو للحبس إذا اقتضى الأمر… اختار أخنوش خطاب تشجيع فيه رؤية على مغرب الغد، مغرب التعليم والصحة وفرص الشغل اللائقة، مغرب المشاريع الكبيرة والتجهيزات المتطورة. مغرب المونديال.

فالوقت لي نزار بركة أمين عام حزب الاستقلال ختار لغة الغوات للي مجاتش معه، ورجع بالوعود الاقتصادية لي بينات على فشلها فالماضي (أحداث شركات عمومية لمعالجة مشاكل سلاسل التوزيع وضبط الأسواق للي حزب كيتحمل جزء كبيرة فيها حيث شادين وزارة التجارة)، ختار أخنوش لغة الهدوء والأرقام الحقيقية بعيدا عن الشعبوية.

وقت وسياق فيديو حصيلة أخنوش كان مدروسة وحتى طريقة التقديم: 5 محاور، 5 دقايق لكل محور.. لتقديم حصيلة 5 سنوات. بلغة دارجة بسيطة، أرقام واقعية، وكادر مبتكر…

من بعد ماقدم الحصيلة في البرلمان، ونشر “كتاب الحصيلة”، أخنوش تكلم مباشرة مع المواطنين عن طريق مواقع التواصل الاجتماعي.

حصيلة بالأرقام، ماشي بالبكا على الأطلال وعلى التماسيح والعفاريت، خصوصا ورؤساء حكومات قبل منو ماعمرهم قدمو الحصيلة (مثال بنكيران).

وبذلك أخنوش طلع مرة أخرى النيفو فالتواصل السياسي، واش غادي يقلدوه السياسيين فإطار الحملة الانتخابية باش يتقربو أكثر من المواطنين، وخاصة الشباب منهم؟.