إصلاح جديد فكليات الطب.. شنو غادي يتبدل بالنسبة للطلبة والأطباء؟ .

مصدر الصورة

كود – كازا //

الحكومة المغربية خرجات مرسوم جديد كيهم طلبة الطب والصيدلة وطب الأسنان، الهدف منو هو تحديث نظام التكوين وتحسين ظروف الخدمة فالقطاع الصحي العمومي.

هاد الإصلاح جا بعدما ولى كاين نقاش كبير فالأعوام الأخيرة حول ظروف التكوين، وعدد الأطباء القليل فبعض المناطق، وكذا مدة الالتزام الطويلة اللي كانت مفروضة على الأطباء الجدد.

أول حاجة مهمة هي أن مدة الالتزام بالخدمة فالقطاع العام غادي تنقص تدريجياً ،حيت من حقبل كان الطبيب الاختصاصي خاصو يخدم 8 سنين بعد التخرج، أما دابا فالحكومة قررات تنقص هاد المدة حتى توصل لـ3 سنين فقط ابتداءً من سنة 2032.

الإصلاح الجديد عطى فرصة للطلبة يدوزو مباراة “الداخلية” من نهاية السنة الرابعة عوض الخامسة، وهاد الشي غادي يسرّع التخصص ويعاون الدولة باش توفر عدد طبير من الأطباء الاختصاصيين.

من جهة أخرى، المرسوم الجديد حسّن الوضعية ديال الأطباء المقيمين، حيث غادي يولي عندهم إطار قانوني وتنظيمي واصح، مع تعيين رسمي وأجرة واستقرار إداري من أول سنة ديال الإقامة.

الحكومة كتقول بلي هاد التغييرات غادي تعاون باش يزيد عدد الأطباء فالقطاع العمومي، خصوصاً فالمناطق اللي كتعاني من الخصاص، وكتراهن توصل لحوالي 2000 خريج سنوياً فـ2030 بدل 1300 فقط فالنظام القديم.

وباش يكون الانتقال تدريجي، تم تقسيم مدة الالتزام حسب سنوات التخرج، يعني الأفواج القريبة غادي يبقى عندها التزام طويل شوية، ومن بعد غادي ينخفض بالتدريج.

هاد الإصلاح هو محاولة جديدة باش الدولة توازن بين حاجة المستشفيات للأطباء، وبين مطالب الطلبة اللي كانوا كيشوفو أن مدة الالتزام طويلة بزاف مقارنة بظروف العمل والتكوين.