كواليس ليلة تاريخية فالمسرح الملكي. سدو البينان ساعة ونص قبل الافتتاح بلا ما وحيدو التلفونات وسدو البيبان حتى خرجو "الشريفات" وسميرة القادري كانت شوهة حفل ما فيهش طابع مغربي والملولي ابدع وفنانة تخباو فالطواليت باش يكميو وسالاوها بالنشيد الوطني .

مصدر الصورة

كود هناء ابو علي ////

البارح 22 ابريل 2026 كانت ليلة تاريخية للمغرب. تاريخية للثقافة. كان تدشين المسرح الملكي فنيا.

التدشين كان دار بشكل ما بعد ما زارتو قبل اشهر الاميرة لالة حسنا مع بريجيت ماكرون مرات الرئيس الفرنسي. من بعد يوم 15 ماي 2025 كان تعقد اول اجتماع لمؤسسة المسرح الملكي اللي كترأسها الاميرة لالة حسنا. فاعضاؤو كل من الشيخة المياسة بنت حمد آل ثاني، رئيسة مجلس أمناء متاحف قطر، وبريجيت ماكرون، مرات رئيس الجمهورية الفرنسية، وعثمان بنجلون، ومايكل زاوي، ومختار ديوب، وهدى الخميس-كانو، وجاد المالح، وميشيل كانيزي، وهيلين ميرسيي-أرنو، وفريد بن سعيد، ومحمد اليعقوبي والي الرباط.

البارح كان تدشين بحفل. طلبو من اللي وجهو ليهم دعوات الحضور من النساء يجيبو القفطان ومن الرجال يجيبو اما كوستيم زرق او كحل او سموكين بنفس اللون. طبعا كانت شي استثناءات. شي وحدين ما جابوش هاد الشي. فالعالم كولو باش يكون حفل فمسرح ملكي بحال ديال الرباط ممنوع يدخل ليه اللي ما حتارمش هاد الشروط. عددهم كان قليل بزاف ولكن كانو شي وحدين من الفنانة ومن المدعويين.

غالبية الحضور البارح كيف عاينات “كود” كانو من الفنانة. حضرو كلهم. حضرو صحاب الشعبي بكل نجومهم وصحاب الغناء العصري وناس السينما والمسرح. كاع اللي عندنا من ممثلين ومخرجين تقريبا حضر. هادو كلهم دارو معاهم فمسرح محمد الخامس. خلاو تلفوناتهم تماك وجابوكم فكيران حتى المسرح الملكي اللي كاين فسلا على ضفاف بو رگراگ كيطلع على برج محمد السادس وضريح محمد الخامس وكيحتاضن سلا والرباط.

الممثلون والفنانة بركوهم فالصفوف اللولى من القاعة الكبرى للمسرح اللي كتهز 1820 شخص. الوزراء ومستشارو الملك اللي حضرو كانو فلوج التحت على ليمن والاميرات الثلات لالة خديجة ولالة مريم ولالة حسنا مع مرات ماكرون كانو فلالوج روايال وباقي كبار الضيوف كانو موزعين بين عدد من ليلوج.

الباب تفتح مع 6 العشية تقريبا. ما كان عند حتى شي مدعو البرنامج. الدعوة فيها الاسم وكارط فيه فين غادي تگلس. صافي. فالباب كيحيدو لباقي المدعويين التلفونات وكيعطيوهم رقم باش ياخدوه باش يخرجو. طبعا ماشي كلشي. شي مسؤول كان هاز الطالكي وجه اوامرو باش يدخل راجل مع جوج مدعوات بلا ما يحيدو ليهم التلفونات. يعني حتى فقضية التلفونات ماشي كلشي كلشي تحيد ليه. غير هو ما شفنا حتى شي واحد من الحضور كيصور داخل القاعة.

تقريبا مع السبعة قل القسمين كان كلشي الحضور فالقاعة. ماشي كلشي كلشي. بقات الشخصيات الكبيرة والاميرات. تقريبا ساعة وربع والمدعويين مريحين فالكراسى. ما كانش توقيت مضبوط باش يبدا الحفل. كان كتيب توزع داخل المسرح الملكي على المدعويين فيه اش غادي كون فالحفل. كل فنان اش غادي يبدع وشحال المدة. فيلم تعريفي بالمسرح فيه 3 دقايق. النشيد الوطني المغربي اللي اداتو الاوركسترا والكورال ثم مقتطف من كونتشيرتو ديال تشايكوفسكي اداه عازف البيانو مروان بن عبد الله ومدتو 11 دقيقة فغناء متفرد لكارمن ديال جورج بيزيي غناتو حليمة محمدي ومدتو 5 دقايق. نفس الفنانة غنات ربيرطوار فيدري ف5 دقايق بعدها كانت سميرة القادري وغنات “ادين بدين الحب” ف8 دقايق وسالات الحفلة ب”رنات الزمنّ” ديال المبدع ادريس الملولي.

مع الثمنية و45 دقيقة تقريبا سالى الحفل. غير البيبان بقاو مسدودين. وقفو رجال امن. قالو لينا “حتى يخرجو الشريفات”. ديك الساعة الاميرات كانو يسلمو على الفنانات والفنانين. كثر من 15 دقيقة ديال التسنية. حتى للي بغى يمشي للطواليت كان خاصو وقت باش يقنع هاد الحارس باش يخرح. وقعات للممثل عبد الرحيم المنياري ولمدعو اخر.

قبل الحفل كانو شي فنانة يضيعو الوقت فالطواليت. يهدرو. شي واحد فيهم ينتر نترات من الكارو الالكتروني. كان سعيد موسكير ومحمد باسو ودخل حتى حاتم عمور وطاليس… شي وحدين منهم ما رجعو للقاعة حتى بدا الحفل.

الغريب انو فالداخل ما خلاوش المدعويين يدورو ويشوفو هاد التحفة المعمارية. كل واحد يتحرك فالبلاصة اللي غادي يدخل منها.

بدا الحفل بالنشيد الوطني وكلشي وقف وردد كلماتو. البرمجة الفنية لهاد الحفل كانت عادية. يمكن اقل من عادية مقارنة بمسرح بحال هاد الهالة. برمجة ما فيهاش تناسق. لكلاسيكي والاندلسي العربي والعود. غير ان اضعف عرض دارتو سميرة القادري اللي غنات “ادين بدين الحب”. الفنانة براسها ما صدقاتش راسها باللي فافتتاح تاريخي. بشكل غريب وقفات ورا المايسترو دينا بنسعيد ماشي قدامها. صوت ضعيف تزاد ضعف مع الاوركسترا. تعاليق كثيرة دارت فالقاعة على حضور هاد السيدة.

مقابل هاد الضعف كان ابداع ارديس الملولي. بان هاد الفنان بحال صوفي دخل فمرحلة الحلول مع العود ديالو. فلحظة حتى المايسترو نسات راسها عاد نبهها باش تعزف الاوكسترا. مبدع كيهدر مع آلتو وكتجاوبو. لحظات كانت الاقوى فالحفل. الاكثر ابداعا. الاكثر صدقا فالاداء. عليها كان تجاوب كبير معاها.

قلنا هاد البرمجة ما كانش فيها تجانس. يوم تاريخي مهم لينا لبلادنا كان خاصو حفل اما فيه التمغرابيت كيف كيهدر عليها الدستور ماشي ابداعات غربية واخرى عربية وبجوجهم ابداعات اجنبية او شي فرقة عالمية ديال البالي. عرض كبير.

هنا محتاجين لمشاريع متفردة. كون الراحل الكوريغراف لحسن زينون حقق مشروعو لكبير ديال بالي مغربي من الرقصات المغربية لكبيرة كون فرقتو دارت الافتتاح. غير مجرد فكر زينون فالمشروع كان الحسن الثاني هددو ايلى قرب للفلكلور المغربي. اليوم عهد جديد كيدعم هاد الابداعات غير ما عندناش امثال زينون لحد الان.

الممسرح الملكي تحفة. الافتتاح كان يكون احسن. على الاقل يحطو للمدعويين الما. غير قرعة الما. يحتارموهم اكثر. ما يبقاوش فالقاعة كثر من ساعة ويتسناو بعد العرض.

يمكن العروض المقبلة ايلى حضرو الامراء والاميرات يكون احترام اكثر للمدعويين. اسناد البرمجة او اي حاجة عندها علاقة بالابداع لابراهيم مزند مانادجر اودادن وفنانين امازيغ اخرين ثم مدير “تيميتار”، مسؤولية فالمسرح الملكي راه عبث. راجل ما يستحقش.

دابا اليوم للفرحة للاحتفاء بهاد المسرح. متعة للعين وللعقل.