علمت “كود” من مصدر مطلع، أن عبد الحق شفيق، عضو المكتب السياسي لحزب الحركة الشعبية، يقود حملة استقطابات من الوجوه القديمة فالبام بجهة كازا سطات وللي مخداوش التزكية من التراكتور مستغلا الصراعات والحروب ديال الترشيحات، منهم ولد زروال واحد من أكبر مستوردي البقر والغنم واللحم والعربي هرامي احد ديناصورات السياسة فإقليم سطات لي باغي يرشح ولدو هشام .

وحسب مصادر “كود” ف سطاسيون ديالو ف مديونة، كيستقبل شفيق الغاضبين من البام ويواعدهم بلي ياخدو التزكية للترشح للانتخابات المقبلة باسم حزب الحركة الشعبية ، منهم ملايرية كبار وبعض المستوردين ديال الغنم والبقر وللي كيستفدو ديما من الامتيازات الضريبية والدعم العمومي.

واوضحت مصادر “كود” بلي عدد من النافذين كاعين من البام بسباب عدم تزكية ابنائهم وهددو بالانسحاب، كما جرى مع الجماني ف الرباط الذي غادر من البام نحو الاحرار بعدما خدا ولدو التزكية باسم الحمامة والعربي هرامي لحط رجلو فالحركة الشعبية بعدما قدم هشامي هرامي استقالته من الجهة ووضع استقالة اليوم الاربعاء بمقر عمالة سطات .

دبا القاعدة الانتخابية للبام بجهة كازا سطات تشتات بسباب هاد الانقسامات وانسحابات الديناصورات الانتخابية من الحزب، فتاح عمار ولد زروال والعربي الهرامي (للي باغي يرشح ولدو هشام الهرامي ) كلهم غادين للحركة الشعبية بالإضافة الى احد الديناصورات فكازا ، هذا المؤشرات تدل على ان تراكتور تفشو ليه الروض بالجهة بسباب تيار الفراقشية لي محسوب على جناح مول الفرماج اللي استقال من البام وحيد ليه القضاء الباسبور وسد عليه الحدود .

وبعد تزكية عبد الكريم امين، برلماني في الاتحاد الدستوري، من طرف البام، ولات واحد شلاظة غريبة فهاد الانتخابات ورجع الترحال السياسي لعادتو. احزاب مقدراتش تجدد ف نخبها وباقي كتستعمل نفس الاعيان ومالين الشكارة فالانتخابات الامر لي غادي ساهم في عزوف مجموعة كبيرة الناخبين .

البام كيحاول ينقي التنظيم ديالو ويبعد المشتبه بهم، باش مايطيحش ف فخ القانون التنظيمي لمجلس النواب للي نص على عدد من العقوبات منها التجريد من المقاعد البرلمانية. لذلك بعد عليه كاع صحاب الملفات وللي عندهم الوسخ،
فالمقابل الحركة الشعبية تستقبل الجميع بما فيهم للي عندهم ملفات.