واش غادي يطلع الكازوال بجوج دراهم نهار اتنين؟. گود سولات الناس ديال الضومين وها جوابهم .

مصدر الصورة

كود – كازا //

طالع موقع كود على تسجيل منسوب لرشيد بوعمارة رئيس لجمعية الجهوية لأرباب النقل فجهة الدار البيضاء – سطات كيخبر فيه أعضاء المكتب التنفيدي بأنه جاوه معلومات من مصادر موثوقة كتأكد أن ثمن الكازوال غادي يطلع ب2 دراهم للتر، بوعمارة شدّد على أن هاد الزيادة غادي تضغط على شركات النقل السياحي وطلب من المهنيين يعمّرو الكازوال قبل ما يطلع الثمن.

رشيد بوعمارة فنفس التسجيل المنسوب ليه أكد باللي غادي يصيفط جوج رسائل رسمية نهار اتنين مورا هاد الزيادة إلا كانت ،وحدة لوزير النقل واللوجستيك و وحدة لوزيرة الطاقة والمعادن باسم الجامعة الوطنية للنقل السياحي لي كيترأسها، باش يسقسي ويشوف اشنو الحلول لي غادي تدار.

مهنيين فجهة الدار البيضاء-سطات أكدو لـ“كود” باللي توصلو بهاد الإشعار فالمجموعات المهنية ديالهم، خصوصاً فمجموعات الواتساب اللي كيجمعو فيها أرباب النقل ،وفالمقابل قالو مهنيين فجهة مراكش-آسفي وجهة بني ملال-خنيفرة باللي ما توصلو حتى بشي إشعار بهاد الخصوص، لا رسمي لا غير رسمي، الشي اللي خلا بزاف ديال المهنيين باقين كيتسناو يتأكد الخبر.

مصدر آخر قال لكود قال أنه “إلى تأكدات هاد الزيادة الكبيرة، غادي تقسم على جوج المراحل، باش ما تأثرش على غفلة وبقوة على القدرة الشرائية ديال المواطنين” ، أما مهني كيخدم فشركة ديال توزيع الكازوال قال لݣود أن دورهم كمهنيين محدود باش يعطيو طلبيات التزود اللي كتوصلهم فـنهار ولا يومين قبل ، وما كيتبلغوش بالأثمنة الجديدة إلا فاللحظات الأخيرة.

خبير اقتصادي صرح للموقع أنه خاص يدار شي حل بحال إلغاء تحرير أسعار المحروقات ولو مؤقتاً، أو يكون تنازل كلي أو جزئي على الضريبة ديال المحروقات لي واصلة (أكثر من 4 دراهم على الكازوال وأكثر من 5 دراهم على البنزين)، ولا ترجع تخدم مصفاة لاسامير المغربية للبترول، باش نقدرو تتجاوزو الأزمات لي كيتعاود وتحما القدرة الشرائية للمواطنين.

الهضرة على الزيادة فثمن الكازوال كترات فواحد السياق اللي كتعرف فيه اتمنة المحروقات تقلبات كبيرة فالسوق الدولية فهاد الايام الأخيرة بسباب حرب الشرق الاوسط لي خلات تمن البرميل يفوت 100 دولار ، هاد الوضع خلا الناس متخوفة من اي انعكاس على سوق الكازوال فالمغرب ، خصوصاً من بعد تحرير سوق المحروقات ف 2015، اللي ولى فيه تحديد الثمن مرتبط بتطورات السوق الدولية وهوامش شركات التوزيع.