عودة الهمة لقيادة البام ضرب للدستور وخطر على ديموقراطيتنا المغربية وبلاصتو حدا سيدنا. راه وصول الاسلاميين للحكم كان من اسبابو وجود هاد الحزب وهاد المستشار فيه .

مصدر الصورة

كود هناء ابو علي ////

نشر موقع “برلمان.كوم” مقال رأي تحدث فيه على عودة فؤاد عالي الهمة مستشار سيدنا. هدرو على اهمية هاد العودة فهاد الظروف. من بعد جا مقال رأي لشخص اخر كيدافع على الفكرة. حتى هو ربطها بالمحيط الدولي وقضية الصحرا. من حق كل واحد يعطي رأيو. الآراء كلها تستحق الاحترام واخا تكون مختالف معاها جدريا.

الهمة كان مع سيدنا. خرج اسس حركة لكل الديموقراطيين ومن بعدها حزب الاصالة والمعاصرة. جا الربيع العربي بحال شي واد حامل ودا معاه كلشي. هاد الحزب اللي جا باش يحارب التيار الاسلامي صدق العكس. بيه قدر حزب العدالة والتنمية يربح الانتخابات جوج مرات 2011 و2016. يعني الهمة للي قال بالي جا يحارب هاد الفكر فحوارو الشهير ف”دوزيم”، جاب لينا الاسلاميين السنوات. اييه ف2016 ما كانش وحتى ف2011 كان انتقل من البام للديوان الملكي كمستشار

دابا هاد الشخص مكانو حدا سيدنا. يبقى فبلاصتو. المغرب كيحكمو دستور. فيه بوضوح الحزب الرابح فالانتخابات كيختار رئيس الدولة منو رئيس الحكومة. سيدنا زاد عطى تأويل ديموقراطي كثر. كيختار الامين العام للحزب الفائز.

فالوقت اللي كنشوفو سيدنا حريص بزاف على الدستور كيخرجو سياسيين كيقولو باللي خاص ضرب هاد الدستور. الفصل 47 من الدستور فيه بالل الملك رئيس الحكومة من الحزب اللي كيربح الانتخابات التشريعية. كثر من هاد الشي فالذكرى 25 من عيد العرش كانو خرجو جوج من مستشاري سيدنا اللي هما عمر عزيمان وعبد اللطيف المنوني =اللي كان رئيس لجنة اعداد الدستور ديال 2011= وقالو بوضوح باللي المغرب باغي يمشي لملكية برلمانية.
سيدنا باغي الديمواقراطية. ما يمكنش يجي سياسي اليوم او اكاديمي وكيطالب بتعيين تقنوقراطي او سياسي دوز سنوات مستشار الملك.

الديموقراطية ديالنا على قد الحال. سيدنا باقي يقويها ولكن ماشي بهاد الشي ديال عودة الهمة لقيادة البام. راه فيها خطورة كبيرة. راه ماشي مستبعد ايلى وصل ترجع قوة للاسلاميين.