في التواصل السياسي، التفاصيل مهمة. في الندوات الصحفية أو أي شكل آخر من التواصل مع الرأي العام ترتيب الوقوف والجلوس، المسافة بين المسؤولين، توزيع الأدوار، وحتى وتعابير الوجه، كلها عناصر كتصنع المشهد، وكتساهم دوز الميساج.

وفالسياسة والاقتصاد والثقافة، ملي كيكون شي نشاط أو ندوة، فبعض المرات مكتكونش التصريحات هي الحدث، بل الصورة والشكل واللباس وحتى النظرات والملامح. وهادشي لي طرا فالندوة الصحافية اللي عقدها وزير الشباب والثقافة والتواصل المهدي بنسعيد، بعد اجتماع مجلس الحكومة لبارح، حيث تحولت الصورة ديال الندوة لعنوان رئيسي غطّى على مضمون التصريحات والخبر الرئيس.

الوزير جلس قدام عشرات الميكروفونات، واقفين موراه الكاتب العام لوزارة الثقافة والشباب والتواصل -قطاع التواصل، وعدد من المسؤولين والمديرين المركزيين في الوزارة، بطريقة عشوائية، وبملامح جامدة ووقفة مقادة وصرامة فالوجوه. للي معارفهمش غادي يسحابليهم “حراس خواص”.

هادشي فالتواصل غريب، “جدار إداري” مور الوزير. بحال بوديكارد واقفين. هي طبعا إهانة لهاد الأطر والكفاءات، ولكن الأهم من ذلك هو أن صور الندوة تسببات في تلويث الخبر الرئيسي، في هاد اللقاء لي كانت فيه فوضى كبيرة.

الندوة كانت مخصصة لتوضيح موقف الحكومة من الجدل المرتبط باستمرارية المجلس الوطني للصحافة، وسحب مشروع مرسوم بقانون كان يقضي بإحداث لجنة خاصة لتسيير القطاع. بنسعيد أكد أن الحكومة ناقشت فعلاً خيار إحداث لجنة مستقلة تضم ممثلين عن مؤسسات دستورية وخبراء، غير أنها خلصت إلى عدم الحاجة إلى مرسوم قانون، ما دام مشروع إعادة تنظيم المجلس يسلك مساره التشريعي العادي، ومن المرتقب أن يكون جاهزاً في شهر ماي المقبل.

لذلك الرسالة السياسية للي حاول الوزير تمريرها بشأن “استمرارية الإدارة كمبدأ” ورفض اللجوء إلى حلول استثنائية، مبانتش قدام هاد الصورة.

ندوة وزير التواصل، خاصها تكون قدوة في التواصل الحكومي والسياسي، من ناحية المضمون، والشكل والتنظيم. ولكن بنسعيد، لي أصلا شفناه كيتواصل ف فرص قليلة بزاف، ما توفقش ف هاد الفوضى لي كانت في الندوة ديال البارح. أصلا القاعة الصغيرة عامرة وزاد عمرها الوزير ب ليكيب ديالو واطر القطاع ديال التواصل.