510 ألف دولار لدعم الأداءات الإلكترونية.. اتفاق بين بنك المغرب والبنك الإفريقي باش يتقلّص التعامل بالكاش .

مصدر الصورة

عمر المزين – كود///

منحات مجموعة البنك الإفريقي للتنمية، عبر “صندوق الشمول المالي الرقمي فإفريقيا”، هبة مالية كتبلغ 510 ألف دولار أمريكي لفائدة صندوق تطوير قبول الأداءات الإلكترونية اللي دارو بنك المغرب، فخطوة جديدة باش يتوسّع استعمال الأداء الرقمي فالمملكة.

وكيهدف هاد التمويل، حسب بلاغ للمجموعة توصلات بيه “كود”، لدعم تعميم وسائل الدفع الرقمية وتعزيز الشمول المالي، مع التقليص من الاعتماد على الكاش فالمعاملات اليومية، وهاد الشي داخل فإطار التوجه ديال المغرب نحو اقتصاد رقمي عصري.

الهبة اللي تقرّرات كتكمّل الموارد المالية اللي سبق وعبّأها بنك المغرب لإنشاء هاد الصندوق، واللي الغاية ديالو هي تشجيع التجار يعتمدوا الأداء الإلكتروني، وينقصو من التعامل بالأوراق النقدية، ويدخلو بقوة فعالم الرقمنة المالية.

وكتجي هاد المبادرة فإطار استراتيجية وطنية لتطوير الأداءات الرقمية، خصوصا فالجوانب المتعلقة بتشجيع الدفع الإلكتروني، ورقمنة المعاملات، وتقليص هيمنة الكاش فالسوق.

وفهاد السياق، صرّح أشرف ترسيم، المسؤول على مكتب البنك الإفريقي للتنمية فالمغرب، بأن الاتفاق غادي يوسّع ولوج المواطنين والتجار للخدمات المالية، ويقوّي منظومة الأداءات الوطنية، ويدعم بناء اقتصاد رقمي شامل ومستدام.

ومن جهتو، أكد المدير العام لبنك المغرب عبد الرحيم بوعزة أن صندوق تطوير قبول الأداءات الإلكترونية كيمثّل رافعة أساسية باش يتسرّع اعتماد هاد الوسائل فالمغرب، وأن دعم الشركاء الدوليين، وعلى رأسهم البنك الإفريقي للتنمية، كيعزّز مبادرة وطنية الهدف ديالها هو توظيف الأداء الإلكتروني فخدمة الإدماج الاقتصادي والاجتماعي.