كشفات مراسلات ووثائق داخلة فملفات جيفري إبستين، اللي وزارة العدل الأمريكية رفعات عليها السرية مؤخراً، بلي اسم مصطفى التراب، المدير العام ديال مجموعة المكتب الشريف للفوسفاط، تذكر بزاف المرات فهاد الوثائق، مع أسماء شخصيات مغربية خرين، وإشارات كثيرة للمغرب ولمدن مغربية مختلفة، فإطار اتصالات، زيارات ومشاريع عقارية.

وحسب هاد الوثائق، اللي تنشرات فأكبر عملية كشف ديال لارشيف مرتبطة بقضية إبستين، تذكر اسم التراب 32 مرة، واسم بنجلون 14 مرة، و اسم المغرب 1475 مرة ،كما بان حضرات مدن مغربية فالمراسلات، بحال مراكش اللي تذكرات 2260 مرة، وطنجة 58 مرة، وأكادير 17 مرة.

وكتبيّن مراسلات راجعة لعام 2011 و2012 معلومات شخصية وتعريفية على مصطفى التراب، فين كتقول عليه وحدة من الرسائل على أنه شخصية “ذكية ومؤثرة” و كيتشاف فداك الوقت على أنه “رئيس حكومة محتمل” فالمغرب حسب وصف جا فمراسلات خاصة مع الأرشيف.

وكتشير وثائق خرى لتنسيق رحلات وزيارات لمراكش، فيها محاولات للتواصل مع التراب لأغراض لوجيستية، ولكن بلا ما يكون فيها حتى شي اتهامات جنائية ولا هضرة على شي نشاط ماشي قانوني.

وفنفس السياق كتبين الوثائق بلي إبستين دوز سنوات وهو كيحاول يشري عقار غالي فحي النخيل فمراكش، مني كتكشف عشرات الإيميلات تفاصيل مفاوضات طويلة باش يشري قصر تقال عليه فالبريات بلي “عمل فني” كبير و مخدوم مزيان .

وحسب هاد المراسلات، طلب إبستين صور وفيديوهات مفصلة للعقار، وركز بزاف على الجوانب التقنية، بحال الكوزينات ، الحمّامات، والأنظمة الميكانيكية، ولكن التمن معجبوش اللي كان مقدّر ب 50 مليون يورو، مني كيهضر على مخاطر مالية وسياسية، وقلة الصفقات باش يقارن فالسوق ديال العقارات الغالية فمراكش.

وكتوضح الوثائق بلي المتاوية دامات سنوات، بمشاركة سماسرية محليين و زيارات للمحل ، قبل ما توقف نهائياً ف 2019، شهور قليلة مني تشد إبستين فمريكان.

للإشارة علنات وزارة العدل الأمريكية نشر أكثر من ثلاثة ملايين صفحة، و180 ألف صورة، و ألفين فيديو مع هاد الملفات، وأكدات بلي ذكر أسماء أشخاص ولا بلدان فهاد الوثائق ما كيشكلش بحد ذاتو دليل إدانة، حيث أغلب المواد كتدخل فإطار مراسلات واتصالات شخصية ولا مهنية مرتبطة بتحقيقات قضائية واسعة.