المكتب السياسي للبام سالا بتجاهل ترشيح واحد منهم سابقا شوكي لرئاسة الأحرار وغموض على "عسيلة" حكومة المونديال..مصدر قيادي ل"گود": ماجبدناش الموضوع .

مصدر الصورة

كود الرباط//

قال مصدر قيادي في المكتب السياسي لحزب الأصالة والمعاصرة، ل”گود”، بلي اجتماعهم مساء اليوم تجاهل ما يحدث في حزب التجمع الوطني للأحرار لأنه شأن داخلي بحسب تعبيره.

وكان المكتب السياسي، عقد لقاء مساء اليوم، قبل ساعات قليلة من المجلس الوطني للحزب اللي غايكون غذا صباح السبت ف سلا، واللي غايكون محطة حاسمة ف مسار ومستقبل الحزب ف الانتخابات المقبلة.

البام، كعادته يجيد المناورات السياسية ف وقتها، واختار يتجاهل الزلزال التنظيمي لي وقع ف الأحرار عقب ترشيح واحد من أبنائه محمد شوكي، لخلافة عزيز اخنوش في المؤتمر المقبل لحزب التجمع الوطني للأحرار.

ونشرت “گود” لبارح، بلي ارتدادات ترشيح محمد شوكي، رئيس فريق التجمع الوطني للأحرار بمجلس النواب، لخلافة عزيز أخنوش على رأس الحزب، وصلت لقيادة حزب الأصالة والمعاصرة، اللي كتشوف فهاد التطور فرصة سياسية سانحة باش تدخل انتخابات 2026 بثقة أكبر، وتدير عملية استقطاب واسعة للكفاءات.

البام والاستقلال دبا منافسين على شكون يكون عسيلة ديال انتخابات2026 ويربح رئاسة حكومة المونديال.

مصادر ’’گود” كتقول باللي شوكي، اللي جاي من الشبيبة ديال البام وفشل يطلع رئيس ديالها ولكن دبا غادي يولي “بين عشية وضحاها” زعيم حزب كيقود الحكومة، كاين لي كيشوفو داخل دوائر فالبام كغريم ضعيف نسبياً مقارنة مع باقي زعماء الأحزاب الآخرين، خصوصاً وأن قيادات الحزب “عارفين عليه كل صغيرة وكبيرة”، من مساره السياسي، لنقط ضعفه فالتدبير، وحتى لشبكات علاقاته المالية والاجتماعية، وكيفاش طلع نجمو فمجال المال والأعمال.

وفق نفس المصادر، قيادات البام عندها تقييم داخلي حول حظوظهم فالانتخابات المقبلة، ولكن لي زاد قوا فرصهم بالفوز هو أن شوكي كيتعتبر أضعف زعيم حزبي وسط تشكيلة زعماء الأحزاب اللي غادي يدخلو غمار انتخابات 2026، وهو ما كيعطي للبام هامش المناورات السياسية أوسع خلال المرحلة الجاية، سواء فبناء التحالفات أو فالتأطير الانتخابي.

فهاد السياق، حزب الأصالة والمعاصرة غايدير المكتب السياسي غدا الجمعة، قبل مايعقد المجلس الوطني ديالو نهار السبت 31 يناير 2026، بقصر المؤتمرات الولجة بمدينة سلا، ابتداءً من الساعة العاشرة صباحاً.

وقبل انطلاق أشغال المجلس، غادي تكون تصريحات صحفية لرئيسة وأعضاء المجلس الوطني، مع السماح بأخذ الصور والفيديوهات إلى غاية عزف النشيد الوطني، على أن تنطلق الجلسة المغلقة مباشرة بعد نهاية كلمة رئيسة المجلس الوطني.

ومباشرة بعد اختتام أشغال المجلس، غادي تتعقد ندوة صحفية لقيادة الحزب، بمشاركة فاطمة الزهراء المنصوري، ومحمد المهدي بنسعيد، وفاطمة السعدي، ونجوى كوكوس، للحديث على انعقاد هاد الدورة، والمستجدات السياسية والتنظيمية داخل الحزب، مع فتح المجال لطرح جميع الأسئلة وتسليط الضوء على الوضع الداخلي للبام والسياق السياسي العام.