الفرق بينا وبين الجزائر هو حنا المخزن ديالنا بعقلو وهوما نظامهم تابعهم في هبالهم، أما راه حنا بحال بحال في العنصرية والهمجية والحگرة، والإعتقاد بالسحور والجنون والتابعة والحضية، والبحث عن الاعتراف من الآخر، وأقول التيران واعر أو راك عدويا، شباب تزادو وكبرو في أوروپا وحتى هوما مآمنين أن الفوطة ديال الحارس ميندي فيها لي گريگري والشعودة، وعوض يركزو على الشبكة يتقبوها بقاو مركزين مع خرقة شبعانة عرق ديال ميندي، والموشكيل هي الحالة ديال الهياج الجماعي لي عمت البلاد، حنا جزيرة حنا قارة حنا حجرة فوق لما، حنا معندنا صحاب معندنا حباب، وكلناهم وشربناهم وتقلبوا علينا خداو لينا الكاس من وسط بلادنا كان خاص يخليوها لينا، عاد زيد عليها الدعوات العنصرية المقيتة مابقى والو يطالبو بقانون جيم كرو.

كاين لي غادي يقول من المبالغة وصف بعض المغاربة بالهمجية، عموما الانسان بطبيعته همجي فاش كيغيب الرادع او يكون الحافز، يكفي تفرج غير فحرب جماهير الفرق المغربية وبعد المرات جمهور نفس الفرقة كينوضوهاً سيوفة ومقاتلة بيناتهم طاحوا فيها الرواح، دابا نيت مواقع التواصل فيها حملة عنصرية ضد خوتنا الافارقة جنوب الصحراء، والسينغاليين لي كانوا باغين يقدموا جيش بلادهم يعاونا في الحرب، نفس داكشي لي دارو الجزائريين باش يبررو الهزيمة ديالهم داروه المغاربة بحدة وبهرجة قل، حيت الحمد الله كاين المخزن قادر يقاد الموارا ديال هاد الشعب، وقادر يذكرهم بالنسخ الحضارية منهم، اما كون كانت عندنا شي قيادة بحال ديال الدزاير غادي نكونوا حرفيا خاوا في الخرى كي قال منانوك،

على مايبدو أن المغربي نسخة متقدمة ومتطورة من الدزايري ساهم في تحضيرها المخزن، أما بلا مخزن راه كنا نكونوا كارثة في هاد القنت، مازال الدراير مغطيين على هبالهم بالبترول والغاز، حنا حلك دلك، غادي نبقاو مقابلين غير حاسدينا تابعينا حنا واعرين حنا عندنا تاريخ، جدودنا كانوا صحاح، وعلى مايدو ان المخزن هو الوحيد لي كيفكر للأمد الطويل في هاد البلاد، وأهوائه وفلسفته تابثة ومستقرة، أما شعيبة الريح لي جا يديه تقدر غير صفحة جزائرية او روم قطري في ديسكورد يسبب كارثة اجتماعية في البلاد ويقسم أطرافها بحال لي دارو في بلدان خرى، جاب الله كاين المخزن.