كود – أگادير //

صادرات الحامض المغربي لإسبانيا عرفات قفزة كبيرة فالموسم الفلاحي 2025/2026، مني وصلات لأعلى مستوى فـ10 مواسم، حسب معطيات وتحليل موقع إيست فروت المتخصص فأسواق الفواكه والخضر.

بين أكتوبر 2025 ويوليوز 2026، استوردات إسبانيا 1.6 ألف طن من الحامض المغربي، بقيمة فاقت جوج مليون يورو.

هاد الكمية كتفوت تقريبا بـ10 المرات اللي تسجل فالعام اللي قبل، وكثر من الضوبل فمجموع الواردات الإسبانية من الحامض المغربي فالمواسم 9 اللي دازو.

وبهاد الارتفاع، ولى المغرب أكبر مورد أوروبي للحامض بالنسبة لإسبانيا من حيث الكمية وكتر بريطانيا وفرنسا.

وفموسم 2025/2026، دخل الحامض المغربي للسوق الإسبانية من نونبر حتى يونيو، وسجلات الفياجات أعلى مستوى ليها فالربيع، خصوصاً فأبريل، ملي وصلات لـ590 طن، الشي لي كان كيمثل ثلث مجموع واردات إسبانيا من الليمون فداك الشهر.

هاد التنقيزة جات فواحد الموسم صعيب بالنسبة لإسبانيا، بعدما تراجع إنتاج الحامض المحلي بـ18.6% مقارنة مع الموسم اللي قبل، وبـ36% مقارنة مع موسم 2023/2024. هاد النقص دفع إسبانيا ترفع من وارداتها باش تغطي الخصاص فالسوق الداخلية وحتى فالتصدير، خصوصاً مع الارتفاع الاستثنائي فالأثمنة.