أميمة عطية ـ كود كازا ///

رجعات السلطات الجزائرية، البارح الأربعاء 7 أكتوبر، دفعة جديدة ديال 33 مواطن مغربي للسلطات المغربية، عبر المركز الحدودي «زوج بغال» قرب وجدة، بعدما كانو مشدودين فقضايا مرتبطة بالهجرة.

وحسب بلاغ الجمعية المغربية لمساعدة المهاجرين في وضعية صعبة، فالدفعة كتضم قاصر واحد، واللي تسلماتو الجهات المختصة ورجعاتو لعائلتو.

ووضحات الجمعية، فنفس البلاغ، أن أغلب لي رجعو من القصر الكبير، فيما كيتوزعو الباقين على مدن الناظور، سطات، وجدة، فاس، بركان، تاونات، الدار البيضاء، تازة، الراشيدية، تنغير، تطوان وجرادة.

وحسب نفس المعطيات، تجمعات عائلات وأمهات فـ«ساحة البريد» بوجدة لاستقبال ولادهم، بعدما رجعو للمغرب.

وكالت الجمعية إن هاد العملية ما كتساليش جميع الملفات المرتبطة بالمغاربة الموقوفين أو المعتقلين فالسياق ديال الحريك، مؤكدة استمرارها فمتابعة ملفات الموقوفين والمعتقلين والمفقودين والمتوفين، إضافة لعدد من القضايا والمحاكمات.

وزادت الجمعية، أنها متبعة حتا، ملفات مغاربة محتجزين فليبيا، وكتواكب العائلات اللي كتقلب على أخبار ولادها، من خلال برنامج «مواكبة ومؤازرة»، إلى جانب المساعدة فإجراءات إثبات الهوية وصلة القرابة.