طبقنا اش قالت رئيسة الحكومة لا كوكوسا ولا اللي ماشي عبقاري لا بيطار لا الصابري يدخلو للحكومة. اللولى سبات ملك السعودية ولخراين ما فيدهمش .
ايلى
هناء ابو علي كازا ///
رئيسة الحكومة المعينة المكلفة بتشكيلها حددات شروط للاستوزار. حنا نصدقوها. اش فهاد الشروط كيف نشراتهم “كود” قبل؟ هي باغية حكومة سياسية عندها قدرة عالية على التأطير. هاد لكلام غير انشاء وصافي ما عندو حتى معنى. نزيدو نشوفو شروط اخرى. ما كايناش عقلية العائلات والمقربين ما كاينش فرض اسماء غير منتمية وتلوينها حزبيا وسياسيا. هاد الشروط واضحة كثر.
على حساب هاد الشروط خاص البام يبدا بيهم. شروط ما كتنطابقش على اسماء كيروج باللي غاديين يدخلو للحكومة. نبداو بنجوى كوكوس. ايلى دخلات للحكومة راه فيها عكس الشروط للي حطاتها رئيسة الحكومة. يالله بدات المحاماة وفتحات مكتب غير قبل اشهر فكازا وترشحات فانفا الي ما عمرها سكنات فيها= بنت سباتة= وهي اصلا عايشة فالرباط مع راجلها. ما عمرها ترافعات. ما عمرها مارسات المحاماة. هاد السيدة اللي باغيين يدخلوها للحكومة او باغية المنصوري تعطيها شي منصب اخر، سبق ليها ف2015 وهاجمات ملك السعودية بعنف فتدوينة على الفايس. باش تخلعات مشات عند صاحبتها اللي كانت واليوم بيناتهم كراهية كبيرة. كان كذبات على المغاربة ومعاها الياس العماري امين عام البام انذاك، باش تقول راه قرصنو حسابها. طبعا ماشي بصاح.
كاين ديال الشبيبة اللي اسمو على غير مسمى “عبقاري”. هاد ولد بابا ما فيدوش. خاص المجلس الاعلى للحسابات يحقق معاه باش كان كاتب عام بالنيابة فوزارة الثقافة. هاد التابع لبنسعيد ضعيف فالتكوين السياسي. فالتدبير.
بحالو بحال النوطير هشام الصابري اللي كان كاتب الدولة لدى وزير الإدماج الاقتصادي والمقاولة الصغرى والتشغيل والكفاءات، المكلف بالتشغيل، شخصية ضعيفة. ما فيهش الكفاءة. ضعيف فالتدبير. تصريحاتو كتكشف حجم غباؤو السياسي وعدم فهمو للمجتمع.
واللي جا فبلاصتو على رأس هيئة الموثقين والطاشرون عادل بيطار حتى هو مرشح للاستوزار. هاد الطاشرون اللي نجح فالبرلمان برلماني عن الحي المحمدي ما عمرو دار شي حاجة لهاد الحي الاسطوري فكازا. كيهمو غير لبني.
هادو ايلى عيناتهم رئيسة الحكومة ولا خداو شي منصب راه كيأكد عقلية العائلات والمقربين اللي قالت نفس رئيسة الحكومة باللي جات باش تحاربهم.
نتسناو اول السيمانا ونشوفو
