كود الرباط//

في الوقت اللي كولشي كيقول بلي كاين توجه داخل البام لرفض التحالف مع حزب التجمع الوطني للأحرار في النسخة الحكومية الجديدة، رئيسة الحكومة المكلفة، فاطمة الزهراء المنصوري، دارت خرجة إعلامية جديدة من بعد الجولة الثانية من المشاورات، ولكن دارت فيها “عين ميكة” على كل ما يروج بخصوص الأحرار.

المنصوري، طلعات قافزة ومبغاتش طيح ف فخ الأسئلة ورفضت تعطي تفاصيل الكواليس حول التحالفات الصعيبة، والتزمت بالهدوء وقالت للصحافة: “الأمور ماشية ميسرة والخدمة مستمرة من أسبوع، وإن شاء الله غادي تكون حكومة في مستوى انتظارات المغاربة والملك”.

هاد التصريح جاء مباشرة من بعد اللقاء اللي جمع المنصوري بنزار بركة، الأمين العام لحزب الاستقلال. هاد الأخير اللي كيعيش هذه الأيام “صداع كبير” وضغوطات داخلية لا تطاق، بسبب التسابق ديال الحقائب الوزارية بين التيارات النافذة داخل الميزان، وعلى رأسهم أعيان وتيارات جهات سوس والصحراء اللي كيطالبو ببلايصهم في كعكة الاستوزار.

المنصوري بانت هادئة وقوية وباغة تضبط الإيقاع وتخرج حكومتها بلا شوشرة، ولكن نزار بركة حاصل ف صراعات الحزب الداخلية، كيبان بلي الجولة الثانية من المشاورات ما زال مخبية كواليس مثيرة، والكتلة الحكومية المقبلة باقي فيها شد وجذب بين الحسابات الحزبية والتوازنات الداخلية.