واش غادي تقدر عليها الحكومة الجاية والسوق العالمية شاعلة؟ لجنة تسقيف أسعار المازوط وليسانس رجعات من بعد الانتخابات كتجمع التوقيعات بخصوص العريضة الوطنية .
أميمة عطية ـ كود كازا //
واش غادي تقدر عليها الحكومة الجاية والسوق العالمية شاعلة؟ السؤال كيرجع للواجهة مع استئناف لجنة المبادرة المواطنة لتسقيف أسعار المحروقات جمع التوقيعات بخصوص العريضة الوطنية للمطالبة بوضع سقف لأسعار المحروقات، بعدما كانت اللجنة وقفات هاد العملية خلال فترة الانتخابات التشريعية.
العودة ديال العريضة جات فواحد الظرفية اللي سوق النفط العالمية كتعيش فيها تقلبات قوية، بحيت تزادت أسعار الخام اليوم الخميس 8 أكتوبر 2026، ووصل خام برنت لحوالي 105 دولار للبرميل، حسب ما نشراتو رويترز، وسط مخاوف مرتبطة بإمدادات النفط من الشرق الأوسط وتصاعد الهجمات على حركة الشحن فمياه الخليج ومضيق هرمز.
وحسب إدارة معلومات الطاقة الأمريكية، متوسط سعر برنت وصل فشتنبر لحوالي 114 دولار للبرميل، بزيادة 23 دولار مقارنة مع غشت، بسبب اضطرابات مرتبطة بالهجمات على منشآت نفطية وناقلات فالشرق الأوسط.
وفهاد السياق، علنت لجنة المبادرة المواطنة استئناف جمع التوقيعات على العريضة الوطنية المطالبة بتسقيف أسعار المحروقات، بعدما كانت قررات توقف العملية في فترة الانتخابات، حرصاً، حسب بلاغها، على استقلالية المبادرة وتفادي أي توظيف أو اصطفاف انتخابي.
اللجنة كتقول إن هاد الزيادة في أسعار المحروقات وانعكاساتها المباشرة وغير المباشرة على القدرة الشرائية، وتكاليف النقل، وأسعار عدد من السلع والخدمات، كيزيد من الأعباء اللي كتتحملها الأسر المغربية.
وباستئناف جمع التوقيعات، كيبقى الهدف هو استكمال العملية تمهيداً لإحالة العريضة على الحكومة المقبلة، مع دعوة المواطنين والمواطنات ومختلف الفعاليات المدنية والنقابية والحقوقية للمشاركة فجمع التوقيعات ودعم المبادرة.
