"الذباح" رجع للمغرب.. منين كتجي هاد الجرثومة وكيفاش نعرفوها؟ .
كود – كازا //
وزارة الصحة والحماية الاجتماعية علنات، الاثنين 28 شتنبر 2026، على جوج بؤر عائلية محدودة ديال داء الخناق، المعروف بالذباح أو الدفتيريا، فجهة سوس ماسة، فآش يكون هاد المرض؟
الذباح مرض بكتيري كيضرب بالأساس النيف والحلق، والجلد، الخطورة ديالو ماشي غير فالالتهاب، ولكن فواحد السم كتنتجو بعض سلالات الجرثومة.
هاد السم كيضر الخلايا ديال الغشا المخاطي وكيخلي طبقة غليظة ورمادية كتلصق فالحلاقم والحلق، ويقدر هاد الشي يضيق مجرى التنفس، وإذا وصل السم للدم، يقدر يأثر على القلب والأعصاب والكلي.
ومن هنا جا الاسم الشعبي ديال المرض: “الخناق” أو “الذباح”، حيث فالحالات الخطيرة يقدر يسبب اختناق وصعوبة فالتنفس.
فالغالب، كتكون فترة الحضانة بين يومين و5 أيام، تال لـ10 أيام، والمريض اللي هاز الجرثومة وما تعالجش، يقدر ينقل العدوى للآخرين.
المسبب الرئيسي للمرض هو واحد النوع ديال البكتيريا سميتو Corynebacterium diphtheriae، أو الوتدية الخناقية.
الدار الحاضنة ديال هاد البكتيريا هو بنادم، وكتقدر يعيش فالنيف والحلق، وفالجلد، سوا عند واحد مريض أو عند واحد حامل للجرثومة بلا أعراض باينة.
بنادم يقدر يبقى هاز للجرثومة لأسابيع وحتى لأشهر، وبالتالي ينقلها وسط الدار أو فالمدرسة.
العدوى كتنتاقل غالباً عن طريق التشاش ديال العطيس الدفال وماشي أي التهاب فالحلق كيعني بالضرورة الخناق، ولكن كاينين أعراض كتخلي الطبيب يشك فالمرض، من بينها الحمى مع التهاب فالحلق وصعوبة السريط، البحة، العيا، وصعوبة فالتنفس.
ومن العلامات اللي كتكون باينة واحد الغشا الرمادي كيلصق فالحلق، واللي يقدر يسيل بالدم إلا تحاول يتحيد.
وفالحالات الخطيرة، المرض يقدر يسد مجرى التنفس، ويدير مشاكل فالأعصاب وحتى تأثيرات على الكلي.
منظمة الصحة العالمية كتذكر أن الخناق يقدر يكون قاتل عند الناس لي ماملقحينش وخصوصاً عند دراري الصغار.
