كود الرباط//

ترتيبات جديدة تقدر تقلب التوازنات السياسية الحالية، خصوصاً مع تداول سيناريو كيرجح تحالف رباعي بقيادة حزب الأصالة والمعاصرة (البام) للحكومة، برئاسة فاطمة الزهراء المنصوري، تحالف جديد بملامح مختلفة على اللي سبق ف2021.

حسب بعض التوقعات، التشكيلة الحكومية المقبلة تقدر تجمع بين أربعة د الأحزاب: البام، الاستقلال، الاتحاد الاشتراكي، وحزب التقدم والاشتراكية. هذا التكتل غادي يعطي للحكومة صبغة “وسط-يسار”، وطبعا هاد الصيغة راجعة للأصول الاديولوجية لهاد الاحزاب لي تبدلات بحيث مبقاش اليمين يمين ولا يسار ولا وسط وسط، بالمقابل غادي يتحول حزب التجمع الوطني للأحرار لتموقع جديد فصفوف المعارضة.
من الناحية التنظيمية والشكلية، كاين توجه واضح نحو النجاعة والتقليص؛ التوقعات كتشير بلي الحكومة ما غاديش تفوت 25 عضو على أبعد تقدير. الهدف هو الاعتماد على بروفايلات تكنوقراطية وكفاءات عالية لتدبير القطاعات الحيوية، وماشي بالضرورة يكونو من الوجوه السياسية المعروفة إعلامياً أو المستهلكة سياسياً.
الهيكلة الجديدة تقدر تجيب معها مفاجآت كبيرة، بحال إمكانية تضمين التشكيلة لـ “وزير دولة”، مع حضور قوي ومفاجئ لبروفايلات نسائية وشبابية ذات كفاءة عالية. ومن المرتقب باش تحظى هذه الحكومة بالتعيين الملكي فأسرع وقت ممكن، وعلى الأرجح نهار الاسبوع المقبل باش تبدأ رسمياً مهامها.